ސަރުކާރުން ކުރާހާ ވެސް ކަމަކީ ރައީސް ނަޝީދުގެ ނަންފުޅު ވިއްކުން: ސައީދު
މި ސަރުކާރުން ދައުލަތް ނުހިންގާ ކަމަށާއި ކުރާހާ ވެސް ކަމަކީ ރައްޔިތުންގެ މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދުގެ ނަންފުޅު ވިއްކުން ކަމަށް މާވަށު ދާއިރާގެ މެންބަރު މުޙައްމަދު ސަޢީދު ވިދާޅުވެއްޖެއެވެ.
ސައީދު މިހެން ވިދާޅުވީ ރައްޔިތުންގެ މަޖިލީހުގެ މިއަދުގެ ޖަލްސާގައި، ޓްރާންސްޕޯޓް އޮތޯރިޓީ އުވާލާ، އެތަނުގެ މަސައްކަތްތައް ޓްރާންސްޕޯޓް މިނިސްޓްރީގެ ދަށަށް ބަދަލުކުރުމަށް ވައިކަރަދޫ ދާއިރާގެ އެމްޑީޕީ މެންބަރު ޙުސައިން ޒިޔާދު ހުށައެޅުއްވި ބިލަށް ވާހަކަފުޅު ދައްކަވަމުންނެވެ.
ސަރުކާރުން ހުރިހާ ކަމެއްވެސް ކުރަނީ ރައީސް ނަޝީދުގެ ނަންފުޅު ވިއްކައިގެންކަން ފާހަގަކޮށް ސައީދު ވިދާޅުވީ ރައްޔިތުން އިންތިޚާބު ކުރި ރައީސްއަށް ރައްޔިތުންނަށް ފައިދާވާ އެއްވެސް ކަމެއް ނުކޮށްދެވޭ ކަމަށެވެ.
"ކައިގެން ބޮއިގެން އެ އުޅުއްވަނީ މަނިކުފާނު ނަންފުޅު ވިއްކައިގެން. މިއީ ކުރާކަމަކީ، ރައީސް ނަޝިދު، ރައީސް ނަޝީދު، ރައީސް ނަޝީދު، ސަރުކާރަކުން ކަމެއް ނުކުރޭ. ކޮބައިތޯ އަޅުގަނޑުމެން އިންތިޚާބުކުރި ރައީސް. މި ދެރައީސުން ޖަހާ ސަކަރާތެއްގައި މުޅި ޤައުމޭ ތާށި ވަނީ. ނިޒާމެއް ނުހިނގައޭ އިއްޒަތްތެރި ރައީސް. އެވާހަކައޭ އަޅުގަނޑު މިދައްކަނީ. ކައިގެން ބޮއިގެން އުޅުއްވަންވީ މީހުންގެ ނަން ވިއްކައިގެނެއް ނޫނޭ"
ސައީދު ވިދާޅުވީ އެ ބިލުގައި ބަޔާން ކުރަނީ، ސަރުކާރަށް ބާރުތައް ޖަމާކުރުމުގެ ވާހަކަތައް ކަމަށާއި ކޮވިޑް-19އާ ގުޅިގެން މުޅި ދައުލަތް ހުއްޓިގެން ދިއުމުން މުޅި ޤައުމު ބަންދުވެފައި އޮއްވާ މަޖިލީހުގެ ޖަލްސާތައް ބާއްވައިގެން މަސައްކަތްތައް ފެއްޓެވީ ވެސް ރައީސް ނަޝީދު ކަމަށެވެ.
އަދި ދެ ރައީސު ޖައްސަވާ ސަކަރާތުގެ ސަބަބުން މުޅި ޤައުމު ހުއްޓިފައިވާ ފަދަ ގޮތަކަށް ރާއްޖޭގެ މަޝްރަހު ސައީދު ސިފަ ކުރެއްވިއެވެ.
