ވެންޓިލޭޓަރު މައްސަލައިގެ ތަހުގީގަށް ބޭނުންވާ މައުލޫމާތު ކޯޓަކުން ނުދިން: އޭސީސީ
ކޮވިޑް-19އާ ގުޅިގެން ރާއްޖެއަށް ވެންޓިލޭޓަރުތަކެއް ގެނައުމުގައި ހިންގި ކޮރަޕްޝަންގެ މައްސަލަ ތަހުގީގު ކުރުމަށް ޓަކައި ބައެއް މީހުންގެ ފޯނު ކޯލް އަޑު އެހުމަށް ކޯޓު އަމުރެއް ހޯދަން އުޅުނު ނަމަވެސް އެ އަމުރު ލިބިފައި ނުވާ ކަމަށް އެންޓި ކޮރަޕްޝަން ކޮމިޝަން (އޭސީސީ)އިން ރައްޔިތުންގެ މަޖިލީހުގެ ކަމާ ގުޅޭ ކޮމިޓީއެއްގައި މިއަދު ވިދާޅުވެއްޖެއެވެ.
ވެންޓިލޭޓަރުތަކުގެ މައްސަލަ ބަލަމުން އަންނަ ޖުޑިޝަރީ ކޮމިޓީގައި މިއަދު ބައިވެރިވެވަޑައިގަތް ކެންދޫ ދާއިރާގެ ޖުމްހޫރީ ޕާޓީގެ މެންބަރު އަލީ ހުސެއިން ވިދާޅުވީ އޭސީސީން ބައެއްގެ ކޯލް ރެކޯޑުތައް އަޑުއެހުމަށް ކޯޓު އަމުރެއް ހޯދުމަށް މަސައްކަތް ކުރި ކަމަށާއި ނަމަވެސް އެކަން ނާކާމިޔާބުވެފައިވާ ޚަބަރު ލިބިވައިގެންނެވި ކަމަށެވެ.
އޭސީސީގެ ރައީސް މަރިޔަމް ޝިއުނާ ވިދާޅުވީ އެކަމާ ބެހޭ މައުލޫމާތު ހާމަ ކުރެވޭނީ ކޮމިޓީ ސިއްރުކޮށްގެން ކަމަށެވެ. ނަމަވެސް އެ މައުލޫމާތު ހާމަ ކުރުމަށް މަޖިލިސް މެންބަރުން ބާރު އެޅުމާ ގުޅިގެން ޝިއުނާ ވިދާޅުވީ އެއީ ހަގީގަތެއް ކަމަަށެވެ.
"އަޅުގަނޑުމެން އެކަމަށް ކްރިމިނަލް ކޯޓުގައި އެދުނިން. ނަމަވެސް އަމުރެއް ނުލިބޭ" އޭސީސީގެ ރައީސް ޝިއުނާ ވިދާޅުވި އެވެ.
ނަމަވެސް އޭސީސީން އަޑުއަހަން ބޭނުންވީ ކާކުގެ ފޯން ކޯލްތަކެއް ކަމެއް ޝިއުނާ ވިދާޅެއް ނުވެއެވެ.
Ads by STO
