އިންސާފުވެރި އިންތިހާބެއް ބާއްވައިދޭން މަޖިލީހުން އެދިއްޖެ
އަންނަ ހޮނިހިރު ދުވަހު އޮންނަ ލޯކަލް ކައުންސިލް އިންތިހާބު ހަމަހަމަ ކަމާއި އިންސާފުވެރި ކަމާއެކު ބާއްވައިދޭން ރައްޔިތުންގެ މަޖިލީހުން އިލެކްޝަންސް ކޮމިޝަންގެ ކިބައިން އެދިއްޖެއެވެ.
މަޖީލީހުގެ ރައީސް މުޙައްމަދު ނަޝީދު މިކަން ވިދާޅުވެފައި ވަނީ މިއަދު ބޭއްވި މަޖިލިސް ޖަލްސާގައެވެ. ނަޝީދު ވިދާޅުވީ، މިއަދުގެ ޖަލްސާއަކީ ކައުންސިލް އިންތިހާބު ކުރިން ބާއްވާ އެންމެ ފަހު ޖަލްސާ ކަމަށެވެ. އަދި އިލެކްޝަންސް ކޮމިޝަނަށާއި އަދި އިލެކްޝަންސް ކޮމިޝަނުގައި މަސައްކަތް ކުރައްވާ އެންމެހާ މުވައްޒަފުންނަށް ހަމަހަމަ އިންތިހާބެއް ބާއްވައި ދިނުމަށް ނަޝީދު ވަނީ އެދިފައެވެ.
"އަޅުގަނޑު އިލެކްޝަންސް ކޮމިޝަނަށާއި އަދި އިލެކްޝަންސް ކޮމިޝަނުގައި މަސައްކަތް ކުރައްވާ އެންމެހާ މުވައްޒަފުންނަށް ވަރަށް ބޮޑަށް އިލްތިމާސް ދަންނަވަން ބޭނުން، އިންސާފުވެރި، ހަމަހަމަ އިންތިހާބެއް ބާއްވައި ދިނުމަށް،" ނަޝީދު ވިދާޅުވި އެވެ.
އެ މަނިކުފާނު އިތުރަށް ވިދާޅުވީ ވޯޓުލުމާއި، ވޯޓުގެ ނަތީޖާ އިއުލާނު ކުރުމުގެ ކަންކަން ވެސް ދެ ފުށް ފެންނަ ގޮތަށް، ޤާނޫނާއި ޤަވާޢިދުގެ އިމުގެ ތެރެއިން ހިންގޭ މަސައްކަތްތަކަށް ވާން ޖެހޭ ކަމަށާއި، އެ މަސައްކަތް ހިންގާނީ އެ ގޮތަށް ކަމާމެދު ޝައްކު ނުކުރައްވާ ކަމަށެވެ.
އަންނަ ހޮނިހިރު ދުވަހު ބޭއްވިގެންދާ އިންތިހާބުގައި 3،934 ކެނޑިޑޭޓުން ވާދަކުރެއެވެ. މިފަހަރުގެ އިންތިހާބުގައި 273،128 މީހުންނަށް ވޯޓްލުމުގެ ހައްގު ލިބިގެންވެއެވެ. އޭގެ ތެރެއިން 5،134 މީހުންނަކީ އިންތިހާބު މި އަހަރަށް ފަސް ކުރުމުން، އެ މުއްދަތުގެ ތެރޭގައި 18 އަހަރު ފުރުނު މީހުންނެވެ.
މިހާރު ދެން ތިޔަ މަޖިލީހަކީ މީހުންގެ ވަރި ކައިވެންޏާއި މުދަލުގެ މައްސަލަ ތަކާއި ޓެކްސް ނެގުމާއި ބަނަދަރު ބައްތި ޖެހުން ވެސް ކުރާ ތަން ވިއްޔާ! އެހެންވީމާ، ކޮންމެ އެއްޗެކޭވެސް ކިޔަނީ. މުޅި އޮޑީގައި ހަސަނުގެ ދެފައި.