މާލެ ސަރަހައްދުގައި ބޯހިޔާވަހިކަމުގެ މަޝްރޫއުތައް ހިންގޭނެ ގޮތް ރާވައި ސަރުކާރަށް ހުށަހަޅާނަން: ޑރ،މުޢިއްޒު
ސަރުކާރުން ބޭނުންވެލައްވާނަމަ މާލޭގައި ހައުސިންގެ މަޝްރޫޢުތައް ހިންގޭނެ ގޮތް ރާވައި ސަރުކާރަށް ހުށަހަޅުއްވާނެ ކަމަށް ޑރ.މުޙައްމަދު މުޢިއްޒު ވިދާޅުވެއްޖެއެވެ.
ރޭ ސަންގު ޓީވީން ގެނެސްދިން ޚާއްޞަ ޕްރޮގްރާމެއްގައި އާންމުންގެ މީހަކު ކުރި ސުވާލަކަށް ޖަވާބު ދެއްވަމުން މާލޭ މޭޔަރުކަމަށް ވާދަ ކުރައްވާ ޑރ.މުޙައްމަދު މުޢިއްޒު ވިދާޅުވީ ހައުސިންގެ މަޝްރޫޢުތައް ހިންގުމުގެ އިޙްތިޞާސް ކައުންސިލްތަކަށް ވެސް އެބައޮތް ކަމަށާއި ނަމަވެސް މިހާތަނަށް އެކަންކަން ކުރިއަށް ގެންގޮސްފައި ވަނީ ސަރުކާރު ތަކުން ކަމަށެވެ.
"ސަރުކާރުން ކައުންސިލް ޕްރޮޖެކްޓެއްގެ ގޮތުގައި (ކުރިއަށް ގެންދަން ބޭނުންވާ ނަމަ) މާލޭގައި ބިމުގައި ވެސް އަދި ވިލިމާލެއާއި ހުޅުމާލޭގެ ފުރަތަމަ ފިޔަވަހީގައި ޖާގަ އެބައޮތް އަދިވެސް ، ދެވަނަ ފިޔަވައްސަށް ބަލައިފިނަމަ އެތަނުން ގޯތި ދޭނެ ޖާގަ ވެސް އެބައޮތް ، މިފަދަ މަސައްކަތްތަކެއް ކުރެވޭތޯ އަޅުގަނޑު ބަލާނަން" މުޢިއްޒު ވިދާޅުވިއެވެ.
މުޢިއްޒު ވިދާޅުވީ މުޅި މާލޭގެ ރައްޔިތުންގެ ވޯޓަކުން މޭޔަރަކު އައްޔަން ކުރާ މިއީ ފުރަތަމަ ފަހަރު ކަމަށާއި އެމަނިކުފާނު މާލޭގެ މޭޔަރުކަމަށް އިންތިޚާބު ވެއްޖެނަމަ އަމާނާތްތެރިކަމާއެކު މަގާމުގެ މަސްޢޫލިއްޔަތު އަދާކޮށް ގެދޮރުގެ މައްސަލައިގައި ނަތީޖާ ނެރެދޭނެ ކަމަށެވެ.
މުޢިއްޒު ވިދާޅުވީ ފްލެޓް އެޅުމަކީ ވަގުތީ ހައްލެއް ކަމަށާއި ދާއިމީ ހައްލެއް ލިބޭނީ މާލޭގެ ރައްޔިތުންނަށް ހުޅުމާލޭ ދެވަނަ ފޭހުންނާއި ގުޅިފަޅުން ގޯތި ދީގެން ކަމަށެވެ. އަދި އެ މަނިކުފާނުގެ މޭޔަރުކަމެއްގައި އެންމެ ބޮޑު އިސްކަމެއް ދެއްވާނީ ގުޅިފަޅަކީ ބޯހިޔާވަހި ކަމަށް ޚާއްޞަ ރަށަކަށް ހެއްދެވުމަށް މަސައްކަތް ކުރެއްވުން ކަމަށް ވެސް މުޢިއްޒު ވިދާޅުވިއެވެ.
