ނަޝީދާއި ރައީސް މިއަދު ވެސް ކުރެއްވީ ކެމްޕެއިން: އިދިކޮޅު
ލޯކަލް ކައުންސިލް އިންތިޚާބުގެ ވޯޓުލުން މިއަދު ކުރިއަށް ދާއިރު، އިންތިޚާބުގައި ވޯޓު އޮޅުވާލައިފައިވާ ކަމަށާއި އެމްޑީޕީގެ ރައީސް މުޙައްމަދު ނަޝީދު އަދި ރާއްޖޭގެ ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހު މިއަދު ވެސް ކެންޕޭން ކުރެއްވި ބުނެ ޕީޕީއެމުން ބަޔާނެއް ނެރެފިއެވެ.
ޕީޕީއެމް އިން ނެރުނު ބަޔާނުގައި ބުނެފައި ވަނީ، ވޯޓުލުން ފެށިގެން މިއަދު ކުރިއަށް ދަނިކޮށް ރައީސުލް ޖުމްހޫރިއްޔާ އިބްރާހިމް މުޙައްމަދު ޞާލިހު ކެމްޕޭނު ކުރަން ޖެހޭ އުސޫލުތަކާ ޚިލާފަށް ރާއްޖޭގެ ގައުމީ މީޑިއާ މެދުވެރިކޮށް ވަކި ޕާޓީއެއްގެ މެމްބަރުންނަށް ކެމްޕޭނު ކޮށްދެއްވައިފައިވާ ކަމަށާއި، އެމްޑީޕީގެ ރައީސްއާއި އެޕާޓީގެ އިސްވެރިންނާއި ޕާލަމެންޓްރީ ގުރޫޕުގެ މެމްބަރުން ވޯޓުލާ މަރުކަޒުތަކުގެ ސަރަހައްދުގައި ވަރަށް ފާޅުކަން ބޮޑު ގޮތަކަށް ކެންޕޭނު ހިންގައި، ނުފޫޒު ފޯރުވައި އަދި ވޯޓު ލަމުންދާ ފަރާތްތަކަށް ބިރު ދެއްކުމުގެ މަސައްކަތް ތަކުރާރުކޮށް ކުރަމުން އަންނަ ކަމަށެވެ.
އަދި އިލެކްޝަންސް ކޮމިޝަނުން ވޯޓުލާ މީހުންގެ ރަޖިސްޓްރީ ބެލެހެއްޓުމުގައި ޤާއިމު ކޮށްފައިވާ އުޞޫލުތައް ފޫދުއްވާލާ އެކި މީހުންގެ ނަމުގައި ނޭނގި ވޯޓުލުމާއި އެކެއްގެ ނަމުގައި ތަކުރާރުކޮށް ވޯޓުލަމުންދާކަމުގެ ހެކި ލިބިފައިވާ ކަމަށެވެ.
ހަމައެއާއެކު މާލޭގެ މޭޔަރުކަމަށް ޕީޕީއެމް ޕީއެންސީ ކޯލިޝަންގެ ފަރާތުން ވާދަކުރައްވަވާ ޑރ މުޙައްމަދު މުޢިއްޒުގެ ފަރާތުން އެކި މަރުކަޒުތަކުގައި ތިބުމަށް ޢައްޔަނު ކޮށްފައިވާ އޮބްޒާވަރުންނަށް އޮބްޒާވްކުރުމުގެ ޙައްޤު ގެއްލުވާލައި ވޯޓުލުން ކުރިއަށް ދާގޮތް މޮނިޓަރކުރުމަށް ދަތިކޮށް ވޯޓުގެ ޞައްޙަކަމާ އިތުބާރު ގެއްލޭނެ ޢަމަލުތައް ހިންގަމުންދާކަމުގެ ޝަކުވާ އޮބްޒާވަރުގެ ފަރާތުން ލިބެމުން އަންނަ ކަމުގައި ވެސް އެ ބަޔާނުގައި ފާހަގަކޮށްފައި ވެއެވެ.
މި ފަދަ އަމަލު ތަކަކީ ވޯޓު ގަޑުބަޑުކޮށް ވޯޓު އޮޅުވާލާ ރައްޔިތުންގެ ހައްގުތަކަށް އަރައިގަތުމަށް މަގުފަހިވާ އަމަލު ތަކެއް ކަމަށް ފާހަގަކޮށް ޑރ މުޙައްމަދު މުއިއްޒު ކެންޕޭން ޓީމުގެ ފަރާތުން އެ ކަންތައްތައް ކުށްވެރިކުރާ ކަމުގައި ވެސް އެ ބަޔާނުގައި ފާހަގަ ކޮށްފައިވެއެވެ.
އަދި މި އަމަލުތައް މިހާރުން މިހާރަށް ހުއްޓާލާ އިންސާފުވެރި އިންތިޚާބެއް ކަށަވަރު ކޮށްދިނުމުގެ ޒިންމާ ދައުލަތުގެ އެންމެހާ ކަމާބެހޭ ފަރާތްތަކަށާއި އަދި ޚާއްސަކޮށް އިލެކްޝަން ކޮމިޝަންއަށާއި އެ ކޮމިޝަންގެ ރައީސަށް ގޮވާލާ ކަމުގައި ވެސް އެ ބަޔާނުގައި ފާހަގަ ކޮށްފައިވެއެވެ.
ކޮބާ. އަހަރެން އަބަދުވެސް ބުނަން ތިޔަ ނަޝީދަކީ ހަމަ ކެނޑި ދުއްދާނު ވެސް ކެނޑި ނެޕީ ޖަހަން ޖެހޭ މީހެކޭ. އަނެއްކާ ދައުލަތުން ބޮޑު ޚާރަދު ބޮނޑިއެެއް ކުރަން ތިޔަ ޖެހުނީ ނަޝީދުގެ ސަބަބުން.