މިހާތަނަށް ގުނި ވޯޓުފޮށިތަކުން 381 ގޮނޑި އެމްޑީޕީއަށް، 288 ގޮނޑި ޕީޕީއެމްއަށް
ލޯކަލް ކައުންސިލް އިންތިހާބުގައި މިހާތަނަށް ގުނައި، ވަގުތީ ނަތީޖާ ލިބުނު ވޯޓުފޮށިތަކުން އެމްޑީޕީއަށް 381 ގޮނޑި އަދި އިދިކޮޅު ޕީޕީއެމްއަށް 288 ގޮނޑި ލިބޭނެ ކަމަށް ދައްކައިފިއެވެ.
މިހާތަނަށް ލިބުނު ނަތީޖާއަށް ބަލާއިރު ސިޓީ ކައުންސިލްގެ 20 ގޮނޑި އެމްޑީޕީން ވަނީ ނަގައިފައެވެ. ޕީޕީއެމްއިން ވަނީ 18 ގޮނޑި ނަގައިފައެވެ. އަދި އަމިއްލަ 3 ކެންޑިޑޭޓުންނާއި ޖޭޕީގެ ކެންޑިޑޭޓެއްގެ އިތުރުން އެމްއާރްއެމްގެ ކެންޑިޑޭޓެއް ވެސް ވަނީ ވަގުތީ ނަތީޖާއިން ސިޓީ ކައުންސިލަށް ހޮވިފައެވެ.
ރަށު ކައުންސިލްގެ ވަގުތީ ނަތީޖާގައި ވެސް ކުރީގައި އޮތީ އެމްޑީޕީއެވެ. އެ ޕާޓީއަށް 291 ގޮނޑި ލިބިފައިވާއިރު ޕީޕީއެމްއަށް ލިބުނީ 219 ގޮނޑިއެވެ. އަމިއްލަ ކެންޑީޑޭޓުންނަށް ވަނީ 129 ގޮނޑި ލިބިފައެވެ.
މި ނަތީޖާތަކަކީ 713 ވޯޓް ފޮށީގެ ތެރެއިން މިހާތަނަށް ނަތީޖާ ލިބުނު 177 ގެ ޖުމްލަ ނަތީޖާއެވެ. އެހެންކަމުން އިތުރު ވޯޓުފޮށިތަކުގެ ނަތީޖާ ލިބުމުން މި އަދަދުތަކަށް ބަދަލު އަންނާނެ ކަމަށް ބެލެވެއެވެ.
