މާލެ ސިޓީއަށް ވާދަކުރި ޕީޕީއެމްގެ ހުރިހާ ކެނޑިޑޭޓުން އިންތިހާބު ކާމިޔާބުކުރި: އަދުރޭ
މާލެ ސިޓީ ކައުންސިލަށް ޕީޕީއެމްގެ ފަރާތުން ކުރިމަތިލި ހުރިހާ ކެނޑިޑޭޓުން އިންތިހާބު ކާމިޔާބު ކުރެއްވި ކަމަށް އިދިކޮޅު ކޯލިޝަންގެ އެކްޓިން ލީޑަރު އަބްދުއްރަހީމް އަބްދުﷲ ވިދާޅުވެއްޖެއެވެ.
ސިޓީ ކައުންސިލްގައި ހިމެނޭ 18 ގޮނޑީގެ ތެރެއިން ޕީޕީއެމުން މި އިންތިޚާބުގައި ވާދަ ކުރީ މޭޔަރު ކެނޑިޑޭޓް ހިމެނޭނެހެން ޖުމްލަ 14 ގޮނޑިއަށެވެ. ޕީޕީއެމުން ބުނާ ގޮތުގައި އެޕާޓީން ވަނީ ތާރީޚީ ކާމިޔާބެއް ހޯދާ މި 14 ގޮނޑި ވެސް ކަށަވަރު ކޮށްފައެވެ.
އަބްދުއްރަހީމް ވިދާޅުވީ މި އިންތިހާބުގައި ސަރުކާރުން އިންތިހާއަށް ޕްރެޝަރު ކޮށްފައިވާ ކަމަށެވެ. އަދި ނުފޫޒު ފޯރުވާ ކުރެވެން ހުރި ހުރިހާ ގޮތަކުން ދަތިތަކާ ކުރިމަތިލާން ޖެހުނު ކަމަށާއި ރަށްރަށަށް ކެމްޕެއިން ކުރަން ނުދިޔަ ނަމަވެސް މާލެއާއި އަދި އަތޮޅުތެރޭގެ ގިނަ ގޮނޑިތައް ޕީޕީއެމުން ނަގައިފައި ވާނެ ކަމަށެވެ.
އިންތިހާބުގައި ހަތަރު ސިޓީއެއްގެ އިތުރުން ހުރިހާ ރަށެއް އަދި އަތޮޅު ކައުންސިލްތަކަށް މެމްބަރުން އިންތިހާބު ކުރާއިރު ޖުމްލަ 3،934 ކެންޑިޑޭޓުން ވަނީ ވާދަ ކޮށްފައެވެ. މީގެ ތެރެއިން 1،670 ކެނޑިޑޭޓުންނަކީ އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ވާދަކުރާ ކެނޑިޑޭޓުންނެވެ.
Ads by STO
