ޕީޕީއެމް އިން ބިސް އަޅައިފި، އެކަމަކު ހާލި ވައްޓާލާކަށް ނުދާނަން: އެމްޑީޕީ
އެމްޑީޕީގެ ހާއްޔަށް ޕީޕީއެމްއިން ބިސް އަޅައިފި ކަމަށާއި ނަމަވެސް ހާލި ވައްޓާލަން ވަޑައިނުގަންނަވާނެ ކަމަށް އެމްޑީޕީގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އިއްޔެ ނިންމާލި ލޯކަލް ކައުންސިލް އިންތިޚާބުގެ ކުރިން ކެމްޕެއިން ތެރެއިން ރައީސް ނަޝީދު ވަނީ ޑރ. މުހައްމަދު މުއިއްޒު މާލޭ ސިޓީ ކައުންސިލްގެ މޭޔަރުކަމަށް އައިސްފިނަމަ ކަންކަން ކުރަން ވަރަށް ދަތިފުޅުވާނެ ކަމަށާއި ނަމަވެސް އެމްޑީޕީގެ ހާއްޔަށް ޕީޕީއެމްއަށް ބިސް ނޭޅޭނެ ކަމަށް ވިދާޅުވެފައެވެ.
މިއަދު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ވަނީ މިހާރު މުއިއްޒު މޭޔަރުކަމަށް ހޮވިވަޑައިގަންފައިވާތީ އެކަމާ ދޭތެރޭ ދެކެނީ ކިހިނެތްތޯ ސުވާލު ކުރައްވާފައެވެ. އެ ސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ ހާލި ހެދީ އެމްޑީޕީން ކަމަށާއި ނަމަވެސް ޕީޕީއެމްއިން އެ ހާއްޔަށް ބިސް އަޅާފައިވާ ކަމަށެވެ.
"ކޮވެއްޔަށް ވީގޮތް ވެ ނިމިފަ މިއޮތީ. ހާލި ހެދީ އަޅުގަނޑުމެން. ކާޅު. ދެން ޕީޕީއެމްއިން އައިސް އެ ތަނަށް ބިސް އަޅާފަ މި އޮތީ. ދެން އަޅުގަނޑު ގަބޫލުކުރާ ގޮތުގައި މީކީ އަޅުގަނޑުމެން ބުޅާ ހެދިފައި ހާލި ވައްޓާލަން ދުއްވައިގަންނަންވީ ކަމެއް ނޫން، އަޅުގަނޑުމެން މި ނިޒާމް ވަރުގަދަކޮށްދީ ރައްޔިތުންނަށް މި ނިޒާމް މެދުވެރިކޮށް ގޮތްތައް ހޯދައިދޭން ޖެހޭނެ. މުއިއްޒު އެކަން ކުރެއްވި ކަމުގައި ވީ ނަމަވެސް އަދި އެހެން މީހަކު އެކަން ކުރެއްވި ކަމެއް ކަމުގައި ވީނަމަވެސް އެކަން ހިންގުމަށް އަޅުގަނޑުމެންގެ އެެއްބާރުލުން ލިބެންޖެހޭނެ" އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ އެކަމަށް އެއްވެސް ހުރަހެއް އަޅައިގެން ނުވާނެ ކަމަށާއި، ރައްޔިތުންނަށް މުހިންމު ވަނީ އެކަންތަށް ކޮށްދޭން ހުންނަ މީހެއް ނޫން ކަމަށާއި ކަންކަން ކޮށްދެވޭނެ މީހެއް ކަމަށެވެ. އެހެންކަމުން ޕީޕީއެމްގެ ކައުންސިލެއް އޮތްކަމުގައި ވީ ނަމަވެސް ބަދަހިކަމާއެކު ސަރުކާރާ ގުޅިގެން ކަންކަން ކުރައްވާނެ ކަމަށް ރައީސް ނަޝީދު ވިދާޅުވިއެވެ.
