އިންޑިއާގައި ކެމްޕޭން ޕޯސްޓަރުތައް ހިއްޕަނީ ކުއްތާތަކުގައި
އިންޑިއާ: އަވަށްތަކުގެ ޕަންޗާޔަތު އިންތިހާބެއް ބޯމަތިވެފައިވާއިރު ކެނޑިޑޭޓުން އަންނަނީ ވަރުބަލި ކަމެއް ނެތި ކެމްޕޭނު ހަރަކާތްތައް ހިންގަމުންނެވެ. އުއްތަރަ ޕްރަދޭޝްގެ އެކި ހިސާބުތަކުގައި މި ކެމްޕޭނުގެ އެކި ހަރަކާތްތައް ހިންގަމުން އަންނައިރު، ދެ ކެނޑިޑޭޓަކު ވަނީ ވަރަށް ތަފާތު ގޮތަކަށް ކެމްޕޭނުކޮށް ގިނަ ބައެއްގެ ސަމާލުކަން ހޯދާފައެވެ.
އާންމުކޮށް ކެމްޕޭނު ޕޯސްޓަރުތައް ފާރުތަކުގައި ތަތްކޮށް އުޅުނު ނަމަވެސް ރާއެ ބަރިއްލޭގެ ކެނޑިޑޭޓަކާއި ބައްލިއާ އަވަށުގެ ކެންޑިޑޭޓަކު ވަނީ މަގުމަތީގައި އުޅޭ ކުއްތާތައް ބޭނުން ކޮށްގެން ކެމްޕޭނު ކޮށްފައެވެ. މި މީހުން ކެމްޕޭނު ޕޯސްޓަރުތައް ހަރުކޮށްފައި ވަނީ މަގުމަތީގައި ދިރިއުޅޭ ކުއްތާތަކުގައެވެ.
އެމީހުން ބުނި ގޮތުގައި މަގުމަތީގައި އުޅޭ މިފަދަ ކުއްތާތަކުގައި ޕޯސްޓަރު ހަރު ކުރުމުން ގިނަ ބަޔަކާ ހަމައަށް މެސެޖު ފޯރުކޮށްދެއެވެ. އަދި މީހުންގެ ސަމާލުކަން ހޯދުމަށް ވެސް ފަސޭހަވެއެވެ.
ނަމަވެސް މި ދެމީހުންގެ މި ކެމްޕޭނު އުކުޅު ހުރިހާ އެންމެންނަކަށް ކަމަކު ވެސް ނުދެއެވެ. އިންޑިއާގެ ޖަނަވާރު ހިމާޔަތްކުރަން ގޮވާލާ ބައެއް ފަރާތްތަކުން ވަނީ މި އަމަލުތައް ކުށްވެރި ކޮށްފައެވެ. އަދި ކުއްތާގެ އިންތިހާބެއްގައި އިންސާނެއްގެ މޫނުގައި ޕޯސްޓަރު ތަތް ކުރުމުން ވާނީ ކީއްތޯ ވަނީ ސުވާލުކޮށްފައެވެ. ބައެއް މީހުން ވަނީ މިކަން ކުށްވެރިކޮށް ފުލުހުން މި މައްސަލަތައް ބަލައި ފިޔަވަޅު އަޅަން ގޮވާލާފައެވެ.
