އާއިލާ މީހުން ހަނީމޫނަށް ދިނީ "ބޮޑު ކެއްސެއް"
އާއިލާ މީހުން ހަދިޔާ ކުރި ހަނީމޫނު ދަތުރަކަށް ދިޔަ މަގުމަތީގައި ބޮޑު ލަނޑެއް ލިބިއްޖެއެވެ.
މުމްބާއީގެ ދެމަފިރިން ކަމަށްވާ މުހައްމަދު ޝަރީގާއި އޮނީބާ ކައުސަރުގެ ހަނީމޫނު ދަތުރު ސްޕޮންސާ ކޮށްދިނީ ޝަރީގުގެ ބޮޑު ދައިތަ ތަބައްސުމް ރިޔާޒް ގުރޭޝީއެވެ.
2019 ވަނަ އަހަރު ހަނީމޫނަށް ދެމީހުން ވެސް ގަތަރަށް ފުރީ ފޮނި އުންމީދުތަކަކާ އެކުގައެވެ. ނަމަވެސް ގަތަރަށް ދިއުމާއެކު ހަމަދު އިންޓަނޭޝަނަލް އެއާޕޯޓުން އެ ދެ މީހުންނަށް ކުރިމަތިވީ ހީވެސް ނުކުރާ ކަމެކެވެ.
އެ ދެމީހުންގެ އަތުގައި މަސްތުވާތަކެތި ހުރި ކަމަށް ޝައްކު ކުރެވިގެން ފުލުހުން އެ މީހުން ފާސްކުރީ އެއާޕޯޓު ތެރެއިންނެވެ. ފުލުހުން ބެލި ބެލުމުން އެމީހުންގެ އަތުން 4.1 ކިލޯގެ މަސްތުވާތަކެތި ފެނުނެވެ.
ކަންތައް ވީ ގޮތް ބެލުމުން އެނގުނީ އެ ދެމަފިރިންނަށް ގަތަރު ދަތުރު ހަދިޔާކޮށް ބޭނުންކުރީ ޑްރަގް ކެރިއަރުންގެ ގޮތުގައި ކަމެވެ. ދެމީހުންގެ ލަގެޖަށް ދުންފަތް ކަމަށް ބުނެ މަސްތުވާތަކެތި ލައިފައި ވަނީ ހަނީމޫނު ދަތުރު ހަދިޔާކުރި ބޮޑުދައިތަ ތަބައްސުމެވެ.
ނަމަވެސް ގަތަރުގެ ކޯޓުން މި ދެމީހުންގެ މައްޗަށް މަސްތުވާތަކެތި އެތެރެ ކުރުމުގެ ދައުވާ އުފުލައި 10 އަހަރުގެ ޖަލު ހުކުމެއް އިއްވިއެވެ.
އޮނީބާ ބަލިވެއިން ކަން ވެސް އެނގުނީ ޖަލަށް ލީ ފަހުންނެވެ. 2020 ވަނަ އަހަރު އޭނާ ވަނީ ޖަލުގައި އިނދެ އަންހެން ކުއްޖަކު ވިހާފައެވެ.
ގާތްގަނޑަކަށް ދެ އަހަރު ޖަލުގައި ހޭދަކުރުމަށް ފަހު ދެމަފިރިންނާއި އެމީހުންގެ ދަރިފުޅު މިނިވަންވީ މި އަހަރުގެ ޖެނުއަރީ މަހުގައެވެ. އަރީބާގެ ބައްޕަ ގަތަރުގެ ނެޝަނަލް ޑްރަގް ބިއުރޯއަށް ފޮނުވި ސިޓީއަށް ހަގީގަތް ކިޔައިދިން އިރު، އެތަނުން ހިންގި ތަހުގީގުން ވަނީ އެ ދެމީހުންގެ ކުށެއް ނެތް ކަން ހާމަވެފައެވެ. އަދި ގަތަރުގެ އެންމެ މަތީ ކޯޓުން ވަނީ އެ ދެމަފިރިންގެ މައްޗަށް އިއްވި 10 އަހަރުގެ ޖަލު ހުކުމް ބާތިލްކޮށްފައެވެ.
ޖަލުން މިނިވަންވެ. ދެމަފިރިންނާއި ދަރިފުޅު އެނބުރި މުމްބާއީ އަށް ގޮސްފައިވަނީ މިދިޔަ ބުދަ ދުވަހުއެވެ.
