ދެން ރެސިޕީ | ހުކުރު ދުވަހަށް ހާއްސަ ބަޓަރ ޗިކަން ބިރިޔާނީ
ރަމަޟާން މަހުގެ ފުރަތަމަ ހުކުރު ދުވަހަށް ކަމަށް ވުމާއެކު މިއަދު މި ގެނެސްދެނީ ހާއްސަ ރެސިޕީއެކެވެ. ބިރިޔާނީގެ ވައްތަރުތަކުގެ ތެރެއިން ވެސް މުޅިން ތަފާތު ވައްތަރެކެވެ. ބަޓަރު ޗިކަން ބިރިޔާނީއެވެ.
ބޭނުންވާ ތަކެތި:
- ½ ޖޯޑު ހަނޑޫ (ތަންކޮޅެއް ހަރުކޮށް ކައްކާފައި)
- 300 ގްރާމް ބޯންލެސް ކުކުޅު (ބޮޑެތިކޮށް ކޮށާފައި)
- 3 ފިޔާ (ތުނިކޮށް ކޮށާފަ)
- ½ ޖޯޑު ޓޮމާޓޯ ޕިއުރީ
- 3 މޭޒުމަތީ ސަމުސާ ޕްލޭން ޔޯގަޓް
- 1 މޭޒުމަތީ ސަމުސާ އިނގުރު އަދި ގާރލިކް ޕޭސްޓް (ކޮންމެ އެއްޗަކުން ½ ސަމުސާ)
- 2 މޭޒުމަތީ ސަމުސާ ކޮތަންބިރި (ހަނާކޮށް މުގުރާފަ)
- 2 މޭޒުމަތީ ސަމުސާ މުގުރި ހިކިމިރުސް
- ½ ޖޯޑު ކޮތަންބިރި ފަތް (ކުދިކޮށް ކޮށާފަ)
- ½ ޖޯޑު ކުދީނާ ފަތް (ކުދިކޮށް ކޮށާފަ)
- 2 މޭޒުމަތީ ސަމުސާ ކެޝޫނަޓް (ޕޭސްޓް)
- 1 މޭޒުމަތީ ސަމުސާ ގަރަމް މަސާލާ
- 4 ކާފޫރުތޮޅި، ކަރަންފޫ، 2 އިންޗީގެ ފޮނިތޮށި
- ½ 1 ސައިސަމުސާ ހަކުރު އަދި ލޮނު
- 2 އަލުވި (ތުނިކޮށް ކޮށާފައި)
ތައްޔާރުކޮށްލާނެ ގޮތް:
ބޮޑު ބޯތައްޓަކަށް ކުކުޅާއި ފިޔާގެ އެއްބައި ، ޓޮމާޓޯ ޕިއުރީ، ޔޯގަޓް، ޖިންޖަރ / ގާރލިކް ޕޭސްޓް، މުގުރި ކޮތަންބިރި، މުގުރި ހިކިމިރުސް، ކޮތަންބިރި ފަތުގެ ½ އާއި ކުދީނާފަތުގެ ½ ، ކެޝޫނަޓްސް ޕޭސްޓް، ހަކުރު، ލޮނު ރަނގަޅަށް އެއްކޮށްލުމަށް ފަހު މޮޑެލާށެވެ. އަދި މެރިނޭޓްކޮށްލުމަށް މަދުވެގެން 1 ގަޑިއިރު ބަހައްޓާށެވެ.
ދެން ފިޔާކޮޅު ރަނގަޅަށް މުރަނަ ވަންދެން ތެލުލާށެވެ.
ކައްކަން ބޭނުންވާ ތެއްޔަށް ތެޔޮފޮދެއް އަޅާ ހޫނު ކޮށްލުމަށްފަހު، ފޮނިތޮށި، ކަރަންފޫ، ކަފޫރުތޮޅި ހަނާކޮށްލާށެވެ. އަދި ކުރިން މޮޑެފައި ހުރި ކުކުޅު މިކްސް ތެއްޔަށް އަޅާ، ކުޑަފެންފޮދެއް އަޅައި، އެއްކޮށްލާށެވެ. އަދި މަތިޖަހާ 15 ވަރަކަށް މިނަޓު ވަންދެން މަޑުގިނީގައި ކެއްކުމަށް ފަހު، ލޮނު ހެޔޮވަރު ކޮށްފައި އުނދުންމަތިން ބާލާށެވެ.
ދެން އެހެންތެއްޔެއްގައި ތެޔޮފޮދެއް އަޅާފައި 2 އަލުވި ތުނިފޮއްޗަށް މަށާފައި ތެލީގައި އަތުރާލާށެވެ. އަލުވީގެ މައްޗަށް ކުރިން ކެއްކި ކުކުޅު މިކްސް އާއި ކުރިން ތެލުލި ފިޔާކޮޅުން ކުޑަ އެތިކޮޅަކާއި ކޮތަންބިރި ފަތާއި ކުދީނާ ފަތްކޮޅުން ވެސް އަޅާށެވެ. އަދި އޭގެ މައްޗަށް ކައްކާފައި ހުރި ބަތްކޮޅު އަޅާފައި، އޭގެ މައްޗަށް ބާކީހުރި ފިޔާ، ކޮތަންބިރިފަތް، ކުދީނާފަތް އަޅައި ރަނގަޅަށް މަތި ކޮށްގެން މަޑުގިނީގައި 10 މިނެޓް ވަންދެން ކައްކާށެވެ.
