އަލީ ޞާލިޙް ވިދާޅުވީ ހެޔޮކޮށެވެ. ރާއްޖޭގައި ފަސް ރުފިޔާ ބަޔަށް ޖީބީއެއް ލިބެއެވެ.

މީސްމީޑިޔާގައި އިއްޔެ ކުރެވުނު އެންމެ ހޫނު ބަހުސެވެ. އިންޓަރނެޓްގެ އަގާ ބެހޭ ގޮތުން ކުރެވުނު ބަހުސެވެ. ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ވެރިކަމާ ހަވާލުވެވަޑައިގެން މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ ނަމުގައި ވަކި ވުޒާރާއެއް އުފައްދަވައި އިންޓަނެޓްގެ އަގު ހެޔޮ ކުރައްވާނެކަމަށް ވަޢުދުވެ ވަޑައިގަތް ފަހުން 3 އަހަރު ނިމެން ދަނީއެވެ.

Ads by MWSC

މިވާހަކަތައް އިއްޔެ ދެކެވެން ފަށައިފައި ވަނީ، ކޮމިއުކޭޝަން މިނިސްޓްރީގެ ސްޓޭޓް މިނިސްޓަރ އަލީ ޞާލިޙް ރާއްޖެޓީވީގެ ފަލަ ސުރުޚީ ޕްރޮގްރާމްގައި ދެއްކެވި ވާހަކަ ތަކާ ގުޅިގެންނެވެ. މިގޮތުން ވިދާޅުވެފައި ވަނީ އިންޓަރނެޓްގެ އަގު ހެޔޮ ކުރުމަށް ރައީސް ޞާލިޙްވެ ވަޑައިގެންނެވި ވަޢުދު ފުއްދަވައިފި ކަމަށާއި މިއަދު ފަސް ރުފިޔާ ބަޔަށް ޖީބީއެއް އެބަ ލިބޭކަމަށެވެ. އިންޓަނެޓް އަގު ހެޔޮ ކުރުމުގެ މަސައްކަތް ޓެކްނޮލޮޖީ މިނިސްޓްރީން މަސައްކަތް ފެށިއިރާއި މިދިޔަ އަހަރާ ހަމައަށް ވެސް މި އަގު ހުރީ 33 ރުފިޔާގައި ކަމަށް އަލީ ޞާލިޙް ވިދާޅުވިއެވެ.

ޖީބީއެއް 5.56 ރުފިޔާ އަށް!

މިސަރުކާރުގެ އިންޓަރނެޓް އަގުހެޔޮ ކުރުމުގެ ވަޢުދުގެ ގޮތެއް ނޭނގެއެވެ. ނަމަވެސް އަލީ ޞާލިޙް ޖެއްސެވި ހިސާބު މުޅިން ނުބައެކޭ ދެންނެވޭކަށް ނެތެވެ. ރާއްޖޭގައި މުއާސަލާތީ ޚިދުމަތްދޭ ކުންފުންޏެއް ކަމަށްވާ އުރީދޫގެ ޕެކޭޖަކުން ޖީބީއެއް އުޅެނީ 5.56 ރުފިޔާ އަށެވެ. އެއީ ރޯދަ މަހާ ދިމާކޮށް އުރީދޫއިން ތަޢާރަފް ކުރި އާޗާ ޕޯސްޓްޕެއިޑް ޕެކޭޖްތަކެވެ.

އާޗާ ޕޯސްޓްޕެއިޑްގެ އެންމެ އަގު ބޮޑު ޕެކޭޖްގައި 1000 ރުފިޔާއަށް 180 ޖީބީ ލިބޭ ކަމަށް ވަނީ ބުނެފައެވެ. އެހެނަސް، އެއީ ޝަރުތުތަކަކާއެކުއެވެ. ދުވާލެއްގެ މައްޗަށް ބޭނުން ކުރެވެނީ ރެގިއުލަރ 3 ޖީބީއާއި ސޯޝަލް މީޑިއާގެ 3 ޖީބީއާއެވެ. މީގެ މާނައަކީ 180 ޖީބީ އެ ލިބެނީ 1،000 ރުފިޔާ އަށެވެ. ޖީބީއެއް 5،56 ރުފިޔާ އަށެވެ.

ސަރުކާރުގެ ބައިވެރިވުމަކާ ނުލާ އަގުތައް ދަށަށް!

މިސަރުކާރުގެ އިންޓަރނެޓް އަގު ހެޔޮ ކުރުމުގެ ވަޢުދު ފުރިހަމަ ވެފައިވާ ކަމަށް އަލީ ޞާލިޙް ވިދާޅުވި ނަމަވެސް މިހާރު ކޮމިއުނިކޭޝަން މިނިސްޓްރީއާ ހަވާލުވެ ހުންނެވި އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވެފައި ވަނީ އިންޓަނެޓްގެ އަގު ހެޔޮކޮށް ރައީސްގެ ވައުދު ފުއްދިފައެއް ނުވާ ކަމަށެވެ، އަދި އެ މަސައްކަތް ދަނީ ކުރެވުމުން ކަމަށާއި ސަރުކާރުގެ ބައިވެރިވުމަކާ ނުލައި އިންޓަނެޓު ޕެކޭޖުތަކުގެ އަގު ދަށަށް ގޮސްފައިވާ ކަމަށް ވެސް އޭނާ ވިދާޅުވިއެވެ.

"އިންޓަރނެޓްގެ އަގު ހެޔޮ ކުރުމުގެ ނިޔަތެއް ސަރުކާރުގައި ނެތް"

އިންޓަރނެޓް އަގު ހެޔޮ ކުރުމުގެ ބަހުސްގެ ތެރެއަށް ވަޒީރު ކަމުން ވަކި ކޮށްފަައިވާ ޓެލެކޮމިއުނިކޭޝަން ސައިންސް އެންޑް ޓެކްނޮލޮޖީ މިނިސްޓަރު މުހައްމަދު މަލީހު ޖަމާލު ވެސް ވަނީ ވަދެވަޑައިގެންފައެވެ. މިގޮތުން މަލީހް ވިދާޅުވީ، ސަރުކާރުން އިންޓަރނެޓް އަގު ހެޔޮ ކުރުމަށް ބޭނުން ނުވާ ކަމަށާއި ވަޒީރުކަމާ ހަވާލުވިތާ 6 މަސް ތެރޭގައި އިންޓަރނެޓު އަގުހެޔޮ ކުރުމަށް ކުރަން ޖެހޭ މަސައްކަތްތައް ކުރުމަށް ފަހު ރައީސް އޮފީހަށް ހުށަހަޅާފައިވާ ކަމަށެވެ.

ރައްޔިތުންގެ ޝަކުވާ އިންތިހާއަށް!

އިންޓަރނެޓްގެ އަގު ހެޔޮ ކުރުމުގެ ވާހަކަ ދައްކާއިރު، ރައްޔިތުން އެންމެ ބޮޑު އެއް ޝަކުވާގެ ވާހަކަ އޮތީ ނުދައްކައެވެ. އެއީ ޑޭޓާ ތްރޮޓޮލް ވުމުން (ކަނޑައެޅިފައިވާ ޑޭޓާ ހުސްވުމުން) އިންޓަރނެޓް ސްޕީޑަށް އަންނަ ބަދަލެވެ. މީގެ ކުރިން ގިނަ ޕެކޭޖްތަކުގައި ޑޭޓާ ތްރޮޓޮލް ވުމުން، 1 އެމްބީޕީއެސް އާ ހަމައަށް ޑޭޓާ ސްޕީޑް ލިބޭއިރު، މިހާރު އެ ސްޕީޑްވަނީ ދެގުނަ ދަށް ކޮށްފައެވެ. މިއާއެކު ޑޭޓާ ބޫސްޓަރތައް ނަގަން ޖެހި، އިންޓަރނެޓަށް ކުރަން ޖެހޭ ޚަރަދު ބޮޑުވެއެވެ. މީގެ އިތުރުން، މަހަކަށް 1 ޖީބީ ބޭނުން ކުރަން ބޭނުންނަމަ ޖީބީއެއް ލިބެނީ 150 ރުފިޔާ އަށެވެ. މިއީ އަލީ ޞާލިޙް ވިދާޅުވި އަގުގެ 30 ގުނަ ބޮޑު އަގެކެވެ. ރައީސް ސޯލިހުގެ ވައުދުގައި ކުލަ ނުޖެހޭ ކަމުގެ ހެއްކެކެވެ.