ރޯދަ މަހުގެ ފުރަތަމަ ހަފްތާ: ވައްކަމުގެ 314 މައްސަލައެއް

ރޯދަ މަހުގެ ފުރަތަމަ ހަފްތާގައި ޖުމުލަ 314 ވައްކަމުގެ މައްސަލައެއް ހުށަހަޅާފައިވާ ކަމަށް ފުލުހުންގެ ތަފާސް ހިސާބުތަކުން ދައްކައިފިއެވެ.

Ads by STELCO

ރޯދަ މަހު ރިޕޯޓް ކޮށްފައިވާ މައްސަލަ ތަކުގެ ތަފާސް ހިސާބުތައް ފުލުހުން ވަނީ "ދެން"އާ ހިއްސާ ކޮށްފައެވެ. އެ ތަފާސް ހިސާބުތަކުން ދައްކާ ގޮތުގައި ރޯދަ މަހުގެ ފުރަތަަމަ 7 ދުވަހު އެންމެ ގިނައިން ހުށަހަޅައިފައި ވަނީ ވައްކަމުގެ މައްސަލަތަކެވެ.

ވައްކަމުގެ އެންމެ ގިނަ މައްސަލަތައް ހުށަހަޅައިފައިވަނީ ނޯތު ސެންޓްރަލް ޑިވިޝަނުންނެވެ. އެއީ 138 މައްސަލައެވެ. އަދި ދެވަނައަށް އެންމެ ގިނަ މައްސަލަ ގްރޭޓާ މާލެ ސަރަހައްދުން ހުށަހަޅާފައިވާއިރު، އަދަދުތައް އުޅެނީ 136ގައެވެ.

ވައްކަމުގެ މައްސަލަތަކަށް ފަހު ދެން އެންމެ ގިނައިން ފުލުހުންނަށް ރޯދަ މަހުގެ ފުރަތަމަ ހަފްތާގައި ހުށަހެޅިފައިވަނީ ޓްރެފިކްގެ މައްސަލަތަކެވެ. އެގޮތުން 108 މައްސަލަ ހުށަހަޅާފައިވާއިރު އެންމެ ގިނައީ ނޯތު ސެންޓްރަލް ޑިވިޝަނުންނެވެ. އެ ޑިވިޝަނުން 49 މައްސަލަ ހުށަހަޅާފައިވާއިރު ގްރޭޓާ މާލެ ސަަރަހައްދުގައި ހުށަހަޅާފައިވަނީ 47 މައްސަލައެވެ.

ޑްރަގްގެ 100 މައްސަަލައެއް ވެސް މިދިޔަ ހަފްތާގެ ތެރޭގައި ފުލުހުންނަށް ހުށަހެޅިފައިވެއެވެ. ޑްރަގްގެ މައްސަލަތައް ވެސް އެންމެ ގިނައީ ނޯތު ސެންޓްރަލް ޑިވިޝަނުންނެވެ. އެއީ 44 މައްސަލައެކެވެ. މާލޭ ސަރަަހައްދުން ހުށަހަޅާފައި ވަނީ ޑްރަގްގެ 32 މައްސަލައެކެވެ.

މީގެ އިތުރުން ވެސް އެކި ބާވަތްތަކުގެ މައްސަލަތައް ފުލުހުންނަށް ވަނީ ހުށަހެޅިފައެވެ. އެގޮތުން ބިރުދައްކައިގެން ކަންކަން ކުރުވުމުގެ 58 މައްސަލަ އަކާއި މާރާމާރީގެ 64 މައްސަަލަ އަކާއި، ފޭރުމުގެ 15 މައްސަލަ އަދި ޖިންސީ ފުރައްސާރައިގެ 18 މައްސަލަ ހިމެނެއެވެ. ހަމަ އެހެންމެ ގެވެށި އަނިޔާގެ 14 މައްސަލައެއް ވެސް ފުލުހުންނަށް ހުށަހަޅާފައިވާއިރު އެންމެ މަދީ ކައުންޓާ ފީޑް ފޯޖަރީގެ މައްސަލަތަކެވެ. އެގޮތުން އެބާވަތުގެ ހުށަހަޅާފައި ވަނީ 2 މައްސަލައެވެ.

ތަފާސް ހިސާބުތަކަށް ބަލާއިރު އެންމެ ގިނަ މައްސަލަ ހުށަހަޅާފައި ވަނީ ނޯތު ސެންޓްރަލް ޑިވިޝަން ( ކ، އއ، އދ، އަދި ވ) ހިމެނޭ ސަރަހައްދުންނެވެ. އެ ސަރަހައްދުން ޖުމުލަ 428 މައްސަލައެއް ފުލުހުންނަށް ހުށަހަޅައިފައި ވެއެވެ. ދެވަަނައަށް އެންމެ ގިނަ މައްސަލަ ހުށަހަޅައިފައި ވަނީ ގްރޭޓާ މާލެ ސަރަހައްދުންނެވެ. އެއީ 386 މައްސަލައެކެވެ.

ފުލުހުންގެ ތަފާސް ހިސާބުތަކުން ދައްކާ ގޮތުގައި ފާއިތުވެދިޔަ ހަފްތާގައި އެންމެ ކުށް މަދީ ސެންޓްރަލް ޕޮލިސް ޑިވިޝަން ( ދ، ފ އަދި މ) ހިމެނޭ ސަރަހައްދުގައެވެ. އެ ސަރަހައްދުން ހުށަހަޅައިފައި ވަނީ ޖުމުލަ 18 މައްސަލައެކެވެ.