ފައިސާ ޗާޕުކުރަން ހުއްދަ ނުލިބުނީ ބައެއް ވަޒީރުން ނުފޫޒު ފޯރުވަން އުޅުއްވުމުން: އާޒިމް
މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ޕަބްލިކް އެކައުންޓުން އޯވަޑްރޯ ކުރުމަށް (ފައިސާ އިތުރަށް ޗާޕް ކުރުމަށް) ރައްޔިތުންގެ މަޖިލީހުން ސަރުކާރާރަށް ދީފައިވާ ހުއްދައިގެ މުއްދަތު އިތުރުކުރަން ފިނޭންސް މިނިސްޓްރީން ރައްޔިތުން މަޖިލީހަށް ހުށަހެޅުމުން، އެކަމާ މެދު ގޮތެއް ނުނިމި ފެއިލްވީ، ބައެއް މެމްބަރުންނަށް ސަރުކާރުން ނުފޫޒު ފޯރުވަން މަސައްކަތް ކުރުމުން ކަމަށް އެމްޑީޕީގެ ޕާލިމެންޓަރީ ލީޑަރު އަލީ އާޒިމް މިއަދު ތުހުމަތު ކުރައްވައިފިއެވެ.
ފައިސާ އިތުރަށް ޗާޕު ކުރުން ހިމެނޭ ގޮތުން، ދައުލަތުގެ ހަރަދަށް ޒިންމާވުމުގެ ގާނުނޫގެ ބައެއް މާއްދާތައް ސަސްޕެންޑްކުރަން ރައްޔިތުންގެ މަޖިލީހުން ނިމިދިޔަ 2020ވަނަ އަހަރު ނިންމާފައި އޮތީ އެއް އަހަރު ދުވަހުގެ މުއްދަތަކަށެވެ. އެ މުއްދަތު މި މަހުގެ 26 ވަނަ ދުވަހަށް ހަމަވާތީ، މުއްދަތު އިތުރުކޮށްދިނުމަށް ފިނޭންސް މިނިސްޓްރީން އިއްޔެ މަޖިލީހުގައި އެދިފައިވެއެވެ.
މި މައްސަލައާ މެދު މަޖިލީހުގެ ޖަލްސާގައި ވޯޓަށް އެހުމުން އެ ހުށަހެޅުން ފާސް ނުވެ ވަނީ ބޭރު ކޮށްލައިފައެވެ. މިއަދުގެ މަޖިލިސް ޖަލްސާގައި އެ ވަގުތު ތިއްބެވި 60 މެމްބަރުންގެ ތެރެއިން 48 މެމްބަރުން ވޯޓު ދެއްވީ އެ ހުށަހެޅުން ފާސްކުރަން ފެނިވަޑައިނުގަންނަވާ ކަމަށެވެ.
އެކަމާ ގުޅޭ ގޮތުން މެމްބަރު އާޒިމް މިރޭ ކުރެއްވި ޓްވީޓެއްގައި އެކަމުގެ ޒިންމާ އެޅުއްވީ ބައެއް ވަޒީރުންގެ އިސްތަށިފުޅުގައެވެ.
އެ ގޮތުން އާޒިމް ވިދާޅުވީ ދައުލަތުގެ ހަރަދަށް ޒިންމާވުމުގެ ގާނޫނަށް އަމަލު ކުރަން ފަސް ކުރުމަށް ދީފައިވާ އިސްތިސްނާގެ މުއްދަތު އިތުރު ކުރުމަށް ފިނޭންސް މިނިސްޓަރު އިބްރާހިމް އަމީރު މަޖިލީހަށް ހުށަހެޅުއްވި ހުށަހެޅުމާ މެދު ގޮތެއް ނުނިމި ދިޔައީ ސަރުކާރުގެ ބައެއް ވަޒީރުން މަޖިލީހުގެ އެމްޑީޕީ ލީޑާޝިޕާ މަޝްވަރާ ކުރުމުގެ ބަދަލުގައި މެމްބަރުންނަށް ނުފޫޒު ފޯރުވައި، ވަކި ގޮތަކަށް ކަންކަން ކުރަން އުޅުއްވުމުން ކަމަށެވެ.
"މިގޮތަށް ކަންކަން ނުކުރުމަށް އެފަދަ ވަޒީރުންނަށް ދަންނަވަން،" މެމްބަރު އާޒިމް ވިދާޅުވިއެވެ.
ފިނޭންސް މިނިސްޓަރުގެ އެ ހުށަހެޅުމަށް އިއްޔެ އެމްޑީޕީގެ ގިނަ މެންބަރުން ފާޑު ވިދާޅުވެ، ނުރުހުން ފާޅު ކުރެއްވިއެވެ. އަދި މިނިސްޓަރުގެ ހުށަހެޅުމަށް ބައެއް ބަދަލުތައް ގެނެސްގެން ނޫނީ އެކަމަށް ހުއްދަ ނުދިނުމަށް ވެސް ގިނަ މެންބަރުން ގޮވައިލެއްވިއެވެ.
