ކައުންސިލް އިންތިހާބުގެ ދާއިމީ ނަތީޖާ: ތިލަފަތަށް 400، ރުކަށް 325 ގޮނޑި
މި މަހުގެ 10 ވަނަ ދުވަހު ބޭއްވި ލޯކަލް ކައުންސިލުތަކުގެ އިންތިހާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ އިންތިހާބުން، ވެރިކަން ކުރާ އެމްޑީޕީއަށް 400 ގޮނޑި އަދި އިދިކޮޅު ޕީޕީއެމް އަށް 325 ގޮނޑި ލިބިފައިވާކަން، އެ އިންތިހާބުގެ ދާއިމީ ނަތީޖާއިން ދައްކައިފިއެވެ.
އިލެކްޝަންސް ކޮމިޝަން (އީސީ) އިން ރޭ އިއުލާނު ކުރި ދާއިމީ ނަތީޖާއިން ދައްކައި ގޮތުގައި އެމްޑީޕީ ކާމިޔާބު ކޮށްފައި މިވަނީ 43 އިންސައްތަ ގޮނޑިއެވެ. އަދި ޕީޕީއެމްއަށް ކާމިޔާބުވެފައި ވަނީ 34.9 އިންސައްތައެވެ.
ރާއްޖޭގައި ފުރަތަމަ ފަހަރަށް ދެ އިންތިހާބެއް އެކުގައި ބޭއްވި މި އިންތިހާބުގައި، ކައުންސިލްތަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް 3،814 ކެންޑިޑޭޓުން ވާދަކުރިއެވެ. މީގެ ތެރެއިން ކައުންސިލްތަކަށް 982 މީހަކު އަދި އަންހެނުންގެ ތަރައްގީއަށް މަސައްކަތް ކުރާ ކޮމިޓީއަށް 930 މީހުންނާ އެކު ޖުމްލަ 1912 މީހުން އިންތިހާބު ކުރަން ޖެހުނެވެ.
އިންތިހާބުގެ ދާއިމީ ނަތީޖާ އިއުލާނު ކޮށްދެއްވަމުން އީސީގެ ރައީސް އަހުމަދު ޝަރީފު ވިދާޅުވީ ކައުންސިލްތަކުގެ 975 ގޮނޑިއަކަށް މީހުން އިންތިހާބު ކޮށްފައިވާ ކަަމަށާއި އަންހެނުންގެ ތަރައްޤީއަށް މަސައްކަތް ކުރާ ކޮމިޓީތަކުގެ އިންތިހާބުގައި 905 މަގާމަކަށް މީހުން އިންތިހާބު ކޮށްފައިވާ ކަމަށެވެ.
ޝަރީފު ވިދާޅުވީ، އެމްޑީޕީން 400 ގޮނޑި ކާމިޔާބު ކޮށްފައި ވަނީ 804 ކެންޑިޑޭޓުން ނެރެގެން ކަމަށެވެ. އަދި ޕީޕީއެމުން 325 ގޮނޑި ކާމިޔާބުކުރީ 646 ކެންޑިޑޭޓުން ވާދަކޮށްގެން ކަމަށް ވެސް ވިދާޅުވިއެވެ.
ކޮމިޝަނުން މިރޭ އާއްމުކުރީ ކައުންސިލްތަކުގެ ނަތީޖާއެވެ. އަންހެނުންގެ ތަރައްގީއަށް މަސައްކަތްކުރާ ކޮމިޓީތަކުގެ ރަސްމީ ނަތީޖާ އަދި ރަސްމީކޮށް އިއުލާނެއް ނުކުރެއެވެ.
އެމްޑީޕީއަށް ހާސިލު ވެފައިވާ 400 ގޮނޑި
3 ސިޓީއެއްގެ މޭޔަރުން
ސިޓީ ކައުންސިލްގެ 18 ގޮނޑި
އަތޮޅު ކައުންސިލް ރައީސުންގެ 11 ގޮނޑި
ރަށު ކައުންސިލްތަކުގެ 71 ގޮނޑި
ކައުންސިލް މެމްބަރުންގެ 155 ގޮނޑި
އަންހެނުންނަށް ހާއްސަކޮށްފައިވާ 142 ގޮނޑި
ޕީޕީއެމްއަށް ހާސިލު ވެފައިވާ 325 ގޮނޑި
މޭޔަރު (މާލެ ސިޓީ)ގެ މޭޔަރު
ސިޓީ ކައުންސިލްގެ 16 ގޮނޑި
އަތޮޅު ކައުންސިލް ރައީސުންގެ 7 ގޮނޑި
ކައުންސިލްގެ ރައީސުންގެ 51 ގޮނޑި
ކައުންސިލް މެމްބަރުންގެ 121 ގޮނޑި
އަންހެނުންނަށް ހާއްސަކޮށްފައިވާ 129 ގޮނޑި
މި ދެ ޕާޓީގެ އިތުރުން، ސަރުކާރު ކޯލިޝަންގައި ހިމެނޭ ޖުމްހޫރީ ޕާޓީން 115 ކެންޑިޑޭޓުން ވާދަކޮށް، ކާމިޔާބު ކޮށްފައިވަނީ 23 ގޮނޑިއެވެ. ހަމަ އެ ކޯލިޝަންގައި ހިމެނޭ އަދާލަތު ޕާޓީން 28 ކެންޑިޑޭޓުން ވާދަ ކުރި އިރު ކާމިޔާބު ކުރީ 11 ގޮނޑިއެވެ. އަދި އެމްޑީއޭއިން ވާދަކުރި ވާދަކުރި 20 ގޮނޑީގެ ތެރެއިން 16 ގޮނޑި ކާމިޔާބު ކޮށްފައި ވެއެވެ. އަމިއްލަ ގޮތުން ކުރިމަތިލީ 600 މީހުންގެ ތެރެއިން 173 މީހުން އިންތިޚާބު ކާމިޔާބު ކުރިއެވެ.
