ކޮވިޑް-19: ފައްސިވީ އަދަދު މިއަދު ވެސް ރިކޯޑު އަދަދަކަށް މަތި!
ރާއްޖެއިން މިއަދު ކޮވިޑް-19 އަށް 386 މީހުން ފައްސިވެއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައި ވަނީ މާލެއިން 105 މީހުންނާއި، އަތޮޅުތަކުން 198 މީހުންނާއި، ހިންގަމުން އަންނަ ރިސޯޓުތަކުން 6 މީހުންނާއި އަދި އިންޑްސްޓްރިއަލް އައިލެންޑްސްއިން 77 މީހެކެވެ.
ރާއްޖެއިން މިބައްޔަށް މިހާތަނަށް 28،588 މީހުން ފައްސި ވެފައިވެއެވެ.
ކޮވިޑް ބަލިން މިއަދު 78 މީހަކު ރަނގަޅު ވެފައި ވެއެވެ. މި އަދަދާއެކު ބަލިން ރަނގަޅުވީ މީހުންގެ އަދަދު ވަނީ 24،499 އަށް އަރައިފައެވެ
ކޮވިޑް ބަލީގައި 71 މީހަކު ރާއްޖެއިން ނިޔާވެފައި ވެއެވެ.
ކޮވިޑަށް ފައްސިވީ އަދަދު މި މަސް ފެށުނުއިރު ދަށްވި ނަމަވެސް މިހާރު އަނެއްކާ ވެސް ފައްސި ނަމްބަރުތައް އަންނަނީ މަތި ވަމުންނެވެ. ޚާއްޞަކޮށް އަތޮޅުތަކުން ފައްސިވާ އަދަދު އިތުރުކަން ފާހަގަ ކުރެވެއެވެ. އެގޮތުން މިހާރު ވެސް ލ.ގަން،ފޮނަދޫ ގދ.ތިނަދޫ އަދި ބ.އޭދަފުށީގެ އިތުރުން ކ.މާފުށީގައި ވެސް ކޮވިޑްގެ ކްލަސްޓަރތައް އުފެދިފައި ވެއެވެ.
