އިންޑިއާއިން ބަސް ގަބޫލެއް ނުކުރި: ސައިންސްވެރިން
އިންޑިއާއިން ކޮވިޑް-19ގެ އައު ވޭރިއަންޓެއް ފެނި، ނުރައްކާ މާ ބޮޑުވެދާނެ ކަމަށް ބުނެ ސަމާލުވާން އެންގުމުން ވެސް އިންޑިއާ ސަރުކާރުން އެކަމަށް މާބޮޑު ފަރުވާލެއް ނުބެހެއްޓިކަމަށް އިންޑިއާ ސަރުކާރުން އެކުލަވާލައިފައިވާ ފޯރަމެއްގައި ހިމެނޭ ބައެއް ސައިންސްވެރިން ވިދާޅުވެއްޖެއެވެ.
މާރިޗު މަހުގައި އިންޑިއާ ސަރުކާރަށް ދިން އިންޒާރަށް މާބޮޑު ސަމާލުކަމެއް ނުދީ، ހަރުކަށި ފިޔަވަޅުތައް ވެސް ގާއިމް ކޮށްފައި ނުވާ ކަން ސައިންސްވެރިން ވަނީ ފާހަގަ ކޮށްފައެވެ. އަދި މިފަދަ ދަނޑިވަޅެއްގައި އިންޑިއާގެ ބޮޑުވަޒީރު ނަރެންދުރަ މޯދީ އިސްވެ ކުރިއަށް ގެންގޮސްފައިވާ ސިޔާސީ އަދި ދީނީ ހަރަކާތް ތަކުގައި ގިނަ ބަޔަކު މާސްކު އެޅުމެއް ނެތި އަންނަނީ ބައިވެރި ވަމުންނެވެ.
ދުނިޔޭގެ ދެވަނައަށް އެންމެ އާބާދީ ގައުމަކީ އިންޑިއާއަށް ވާއިރު، މިހާރު އިންޑިއާ އަންނަނީ ކޮވިޑް-19 ކޮންޓްރޯލް ނުވެ ބޮޑު ބަޔަކަށް ފެތުރިފައެވެ. ސައިންސްވެރިން ކުރިން ވިދާޅުވި، ފަދައިން ނުރައްކާތެރި ކޮވިޑްގެ ވައްތަރަކާއެކު އެގައުމުން ފައްސިވާ މީހުންގެ އަދަދު އެތައް ގުނައަކަށް އިތުރުވެ ދުނިޔޭގެ ރެކޯޑެއް ވެސް ހަދައިފައިވެއެވެ.
މިދިޔަ އަހަރު އިންޑިއާއިން ކޮވިޑް-19 މެނޭޖް ކުރުމުގައި ބޮޑެތި ކާމިޔާބީ ތަކެއް ހޯދި ނަމަވެސް، މިމަހުން ފެށިގެން އިންޑިއާގެ ހާލަތު މިވަނީ ވަރަށް ބޮޑުތަން ގޯސްވެފައެވެ. ދުވާލެއްގެ މައްޗަށް އެތައް ލައްކަ މީހުން ކޮވިޑް-19 އަށް ފައްސިވަމުން އަންނައިރު، ބަލީގައި ފަރުވާ ނުދެވި އެތައް ބަޔަކު ދަނީ މަރުވަމުންނެވެ.
