ކުޅުދުއްފުއްޓަށް އަރައިފޭބުން މަނާކޮށްފި
ހދ ކުޅުދުއްފުށިން ކޮވިޑް-19އަށް މީހަކު ފައްސިވުމާ ގުޅިގެން އެ ރަށަށް އަރައި ފޭބުން މަނާކޮށްފިއެވެ.
“ދެން”އަށް މައުލޫމާތު ލިބިފައިވާ ގޮތުގައި އެރަށުން ފައްސިވެފައި ވަނީ ފްލޫ ކްލިނިކަށް ދެއްކި ތިން މީހެކެވެ. އަދި މި ތިން މީހުން ވެސް ޑޮކްޓަރަށް ދައްކައިފައި ވަނީ ބަލީގެ އަލާމާތްތައް ހުރުމުގެ ސަބަބުންނެވެ.
މިއާ އެކު އެ ރަށަށް އަރައި ފޭބުން މަނާ ކުރުމުގެ އިތުރުން ރަށުތެރެއަށް ބަލި ފެތުރިފައިވާ މިންވަރު ބެލުމަށް ކޮންޓެކްޓް ޓްރޭސިން ދެނެގަތުމާއި ރެންޑަމް ސާމްޕަލް ނެގުމުގެ މަސައްކަތް ދަނީ ކުރިއަށެވެ.
މި ދުވަސްވަރު ރާއްޖޭގެ އެކި އަތޮޅުތަކުން ކޮވިޑަށް ފައްސި ކޭސްތައް ގިނަ އަދަދަކަށް އެބަފެނެއެވެ. އެގޮތުން ހައްދުންމަތިން ފޮނަދޫއާއި ގަމުގެ އިތުރުން މާބައިދޫ އަދި އިސްދުއާއި ދަނބިދޫން ވެސް ފައްސި ކޭސްތަކެއް ފެނި އެ ރަށްރަށް ވަނީ މޮނިޓަރިންއަށް ލައިފައެވެ. މީގެ އިތުރުން އައްޑޫ ސިޓީއާއި ގދ.ތިނަދޫ އަދި ކ.މާފުއްޓާއި އއ.ރަސްދުއާއި އއ.މަތިވެރީގެ އިތުރުން ގިނަ ރަށްތަކެއް މި ވަގުތު މޮނިޓަރިންގައި އެބައޮތެވެ.
