ޑައިޓުގައި ތިބި ކުދިންނަށް ތައްޔާރު ކޮށްލެވިދާނެ މީރު ސެލެޑެއް!
މިއީ ވަރަށް ފަސޭހައިން ތައްޔާރު ކޮށްލެވިދާނެ ސެލަޑެކެވެ. މި ސެލަޑު ތައްޔާރު ކުރުމުގައި ބޭނުންވާ ތަކެތީގެ ތެރޭގައި ހިމެނޭ ތަކެތި ނުލިބޭނަމަ ބަދަލުގައި ބޭނުން ކުރެވިދާނެ ތަކެތި ވެސް ބުރެކެޓްގައި ލިޔެފައިވާނެއެވެ. އިތުރަށް ސެލަޑް މީރު ކޮށްލުމަށްޓަކައި ކްރުޓޮން ބޭނުން ކުރެވިދާނެއެވެ.
ކުރުޓޮން ތައްޔާރު ކުރުމަށް ބޭނުންވާ ތަކެތި: ކްރުޓޮން ބުރެޑް ނުވަތަ (އާދައިގެ ޕާން) ހަތަރެސްކަނަށް ކުދިކޮށް ކޮށާފައި، 1 ސައިސަމުސާ އޮލިވް އޮއިލް، ކުޑަ އަސޭމިރުސްކޮޅެއް، ކުޑަ ލޮނުކޮޅެއް، ޗީޒް ކޮޅެއް
ކްރުޓޮން ތައްޔާރުކުރާނެ ގޮތް: ކްރުޓޮން ބުރެޑް ނުވަތަ (އާދައިގެ ޕާން) ޓުރޭއަކަށް އެޅުމަށްފަހު އޮލިވް އޮއިލް، ޗީޒް ، އަސޭމިރުސް އަދި ލޮނުކޮޅެއް އެޅުމަށްފަހު ރަނގަޅަށް އެއްކޮށްލާށެވެ. ދެން 190 ޑިގްރީއަށް އަވަން ބެހެއްޓުމަށްފަހު 10 މިނެޓް ވަންދެން ފިހެލުމަށްފަހު ނަގާށެވެ.
ބޭނުންވާނެ ތަކެތި:
2 ޓޮމާޓޯ ( ކިއުބުކޮށް ކުދިކޮށް ކޮށާފައި)
1 ފިޔާ ( ކިއުބުކޮށް ކުދިކޮށް ކޮށާފައި)
1 މިރުސް ( ކިއުބުކޮށް ކުދިކޮށް ކޮށާފައި)
5 ލެޓިއުސްފަތް ނުވަތަ ( ކެބެޖު ) އެއް ޖޯޑު
1 ކެރެޓް ( ކިއުބުކޮށް ކުދިކޮށް ކޮށާފައި)
1 އޮރެންޖު ( ކިއުބުކޮށް ކުދިކޮށް ކޮށާފައި)
1 ލިނބޯ
1 އާފަލު (ކިޔުބުކޮށް ކުދިކޮށް ކޮށާފައި)
1 ސައިސަމުސާ އޮލިވް އޮއިލް
ކުޑަ އަސޭމިރުސްކޮޅެއް
1 ސައިސަމުސާ މާމުއި
ތައްޔާރުކުރާނެ ގޮތް:
ފުރަތަމަ ބޮޑުތައްޓެއްގެ ތެރެއަށް މާމުއި، އޮލިވް އޮއިލް އަދި އަސޭމިރުސްކޮޅެއް އެޅުމަށްފަހު ސަމުސަލަކުން ރަނގަޅަށް އެއްކޮށް ގިރާލާށެވެ. ދެން އިރުކޮޅަކު ބެހެއްޓުމަށްފަހު، ބާކީ ހުރި ތަކެތި ތައްޓަށް އަޅައި ރަނގަޅަށް އެއްކޮށްލުމަށްފަހު އެންމެ ފަހުން ކްރުޓޮން ކޮޅު އަޅާލުމަށް ފަހު ލިނބޯ ހުތްކޮޅެއް އަޅާ ހުރިހާ ބާވަތެއް އެއްކޮށްލާށެވެ. އަޖުމަ ބަލާލުމަށް ތައްޔާރުކޮށްލަވާ!
ނޯޓު: ނާރެސް އިން ނެގުނު ރެސިޕީއެއް
