ލީގަލް ކައުންސިލުން ދެއްކެވި ވާހަކަތަކުން ދޭހަވީ އިބްރާ ކުރެއްވި ޓްވީޓުތަކެއް ތަފްސީލު ކޮށްދެއްވިކަން: އިންތި
ރައީސުލްޖުމްހޫރިއްޔާ އިބްރާޙިމް މުޙައްމަދު ޞާލިޙުގެ ލީގަލް ކައުންސިލުން ރޭ ދެއްކެވި ވާހަކަތަކުން ދޭހަވީ، މަންދު ކޮލެޖުގެ ވެރިޔާ އިބްރާހިމް އިސްމާއިލް (އިބްރާ) ކުރެއްވި ޓްވީޓުތަކެއް ތަފްސީލު ކޮށްދެއްވީ ކަމަށް ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އަދި މަޖިލީހުގެ ޖުޑިޝަރީ ކޮމިޓީގެ ޗެއާމަން އިމްތިޔާޒް ފަހުމީ (އިންތި) ވިދާޅުވެއްޖެއެވެ.
ޖުޑިޝަރީ ކޮމިޓީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމެއްގައި އިންތި ވަނީ ރައީސް އޮފީހުން ރޭ ބޭއްވި ނޫސްވެރިންގެ ބައްދަލުވުމުގައި، މަޖިލީހުގެ ޖުޑިޝަރީ ކޮމިޓީއާ ގުޅޭގޮތުން ދެއްކެވި ބައެއް ވާހަކަތަކަށް ރައްދު ދެއްވާފައެވެ.
އެގޮތުން އިންތި ވިދާޅުވީ ރައީސުލްޖުމްހޫރިއްޔާގެ ލީގަލް ކައުންސިލުން ރޭ ފާހަގަ ކުރެއްވި އެއް ވާހަކައަކީ މަޖިލީހަށް ހުށަހެޅިފައިވާ ބިލުތައް ލަސްވުމުގެ ސަބަބުން އިންސާފު ނުލިބިފައިވާކަން ކަމަށާއި ނަމަވެސް ފުރިހަމަ ބިލެއް ފޮނުވުމަށް އޭޖީން އަހަރެއްހައި ދުވަސް ވެފައިވާ ކަމަށެވެ.
"އޭގެ ނަތީޖާއެއްގެ ގޮތުގައި ބައެއް މީޑިއާ ތަކުގެ ސުރުޙީ ތަކުގައި ވެސް ލިޔެފައި އެބަހުރި 'މަޖިލީހަށް ފޮނުވާ ބިލުތައް ލަސްވުމަކީ އިންސާފަށް އޮތް ހުރަހެއް' ކަމަށް. ރައީސުލްޖުމްހޫރިއްޔާގެ ލީގަލް ކައުންސިލުން ދެއްކެވި ވާހަކަފުޅުން އަޅުގަނޑަށް ޖުމްލަ ގޮތެއްގައި ފާހަގަ ކުރެވުނީ މަންދު ކޮލުޖުގެ ވެރިޔާ ކުރެއްވި ޓްވީޓުތަކެއް ތަފްސީލު ކޮށްދެއްވިކަން. އަޅުގަނޑަށް އެ ނޫސްވެރިންގެ ބައްދަލުވުމުން އަޅުގަނޑަށް ދޭހަވީ ކަމަކީ އެއީ" އިންތި ވިދާޅުވިއެވެ.
އިންތި ވިދާޅުވީ ޖުޑީޝަރީ ކޮމިޓީގެ އެންމެހާ މަސައްކަތްތަކެއް ވަރަށް ބާރަށް ކުރިއަށްދާ ކަމަށެވެ. އެގޮތުން ސަރުކާރުން ފޮނުވާ ބިލުތަކަށް ވަރަށް އަހައްމިއްޔަތުކަން ދީގެން، ކޮމިޓީގެ ހުރިހާ މެމްބަރުން ވެސް ވަރަށް އެއްބާރުލުން ދީގެން މަސައްކަތް ކުރާ ކަމަށެވެ.
