އިއްޔެ ފައްސިވީ މީހުންގެ ތެރޭގައި ވެކްސިން ނުޖެހޭ އުމުރުގެ 80 ކުދީން ހިމެނޭ
އިއްޔެ ރާއްޖެއިން ފައްސިވީ މީހުންގެ ތެރޭގައި ވެކްސިން ނުޖެހޭ އުމުރުގެ 80އަށް ވުރެ ގިނަ ކުދީން ހިމެނޭ ކަމަށް އޭޑީކޭ ހޮސްޕިޓަލްގެ ކުޑަކުދީންގެ ޑޮކްޓަރު ޢަބްދުﷲ ނިޔާފް ވިދާޅުވެއްޖެއެވެ.
ނިޔާފު ވިދާޅުވީ އެ ކުދީންގެ ތެރެއިން ގިނަ ކުދީންނަކީ އާއިލީ މެމްބަރަކާ އެއްތާވުމުގެ ސަބަބުން ފައްސިވީ ކުދީންތަކެއް ކަމަށެވެ.
ޑރ. ނިޔާފް ވިދާޅުވީ ކުދީން ސަލާމަތް ކުރެވޭނީ ބޮޑެތި މީހުން ރައްކާތެރިކަމުގެ މިންގަނޑުތައް ޚިޔާރު ކޮށްގެން ކަމަށެވެ.
ކޮވިޑުން ރައްކާތެރިވުމުގެ ގޮތުން ރާއްޖޭގައި ވެކްސިން ދެނީ 18 އަހަރުން މަތީގެ މީހުންނަށެވެ. ނަމަވެސް ޞިއްޙީ މައްސަލަތައް ހުންނަ ހައި ރިސްކުގެ ކުދީންގެ ތެރެއިން 16 އަހަރުން މަތީގެ ކުދީންނަށް ފައިޒާ ވެކްސިން ދެއެވެ.
އިއްޔެ ރާއްޖެއިން ރެކޯޑް އަދަދަކަށް ފައްސި ވޭދަނަތައް ފެނިފައި ވެއެވެ. އެގޮތުން 734 ފައްސި ވޭދަނައިގެ ގޮތުގައި ރެކޯޑް ކުރެވިފައިވާއިރު ޞިއްޙީ ނިޒާމަށް ބޮޑެތި ގޮންޖެހުން އޮތްކަމުގެ އަލާމާތްތައް ދަނީ ފެންނަމުންނެވެ. އޭގެ ތެރޭގައި ކޮވިޑް ފެސިލިޓީތަކާއި އައިސީޔޫތައް ފުރެމުން ދާކަމުގެ ނުރައްކާތެރި ސިގްނަލް ކަމާ ބެހޭ ފަރާތްތަކުން ވަނީ ދީފައެވެ.
