ރައީސް ނަޝީދަށް ދިން ހަމަލާއާ ގުޅިގެން ދެމީހަކު ހައްޔަރު ކޮށްފި
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ހަމަލައިގެ މައްސަލައިގައި ދެމީހަކު ހައްޔަރު ކުރެވިފައިވާ ކަމަށް ފުލުހުން ދެންމެ ވިދާޅުވެއްޖެއެވެ.
ފުލުހުން ދާދި ދެންމެއަކު ކުރި ޓްވީޓެއްގައި ވިދާޅުވީ މި މައްސަލައާ ގުޅުން ހުރި ދެމީހަކު ހައްޔަރު ކުރެވިފައިވާ ކަމަށާއި އެ ދެމީހުންގެ އިތުރު މައުލޫމާތު މިއަދު ހަވީރުގެ ޕްރެސް ބްރީފިންގައި ހިއްސާ ކުރައްވާނެ ކަމަށެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ މި ހަމަލައިގައި ޝައްކު ކުރެވޭ ހަތަރު މީހަކު އެ ސަރަހައްދުން ފުލުހުންގެ ތަހުގީގަށް ފާހަގަ ކުރެވިފައިވާ ކަމަށެވެ. އަދި އެ ތަނުގައި ގޮއްވައިލެވުނު ސައިކަލާ ގުޅޭ ސާފު މައުލޫމާތު ވެސް ލިބިފައިވާ ކަމުގައި ފުލުހުން ވިދާޅުވިއެވެ.
ރައީސް ނަޝީދަށް ހަމަލާ ދިނީ މެއި 6ވަނަ ދުވަހުގެ ރޭ 8:27ހާއިރު އެމަނިކުފާނު ދިރިއުޅުއްވާ ގެކޮޅު ކެނެރީގެއިން ނީލޯފަރު މަގުން މަޖީދީމަގަށް ހިންގަވައި ވަޑައިގެން ކާރަށް އަރުއްވަން އުޅުމުގެ ތެރޭގައެވެ.
Ads by STO
