ގޮއްވައިލި ސައިކަލުގެ ވެރިފަރާތް، ފުލުހުންގެ ބެލުމުގެ ދަށަށް ގެންގޮސްފި
ކުރީގެ ރައީސް މުޙައްމަދު ނަޝީދަށް އަމާޒުކޮށް ދިން ހަމަލައިގައި ގޮއްވައިލި ސައިކަލުގެ ވެރިފަރާތް ފުލުހުންގެ ބެލުމުގެ ދަށަށް ގެނެވިފައި ކަމަށް ފުލުހުން ވިދާޅުވެއްޖެއެވެ.
ފުލުހުން މިހާރު ކުރިއަށް ގެންދާ ނޫސްވެރިންގެ ބައްދަލުވުމުގައި ކޮމިޝަނަރ އޮފް ޕޮލިސް މުޙައްމަދު ހަމީދު ވިދާޅުވީ ރައީސް ނަޝީދަށް ދިން ހަމަލައިގައި ގޮއްވައިލި ސައިކަލުގެ އިންޖީނުގެ އަސްލު ނަންބަރު ޕްލޭޓު ވަނީ ކަހާލައިފައި ކަމަށާއި ނަމަވެސް ފުލުހުންގެ ތަހުގީގު ޓީމުން ވަނީ އެ ސައިކަލުގެ އަސްލު ނަންބަރު ޕްލޭޓު ހޯދިފައި ކަމަށާއި އަދި ސައިކަލުގެ ވެރިފަރާތް މިހާރު ވަނީ ފުލުހުންގެ ބެލުމުގެ ދަށުގައި ކަމަށެވެ.
ރައީސް ނަޝީދަށް އަމާޒުކޮށް ދިން ހަމަލައިގައި ޝައްކު ކުރެވޭ ދެ މީހަކު މިހާރު ފުލުހުންގެ ބެލުމުގެ ދަށަށް ގެންގޮސްފައިވީ ނަމަވެސް، މި ހާދިސާގައި ތުހުމަތު ކުރެވޭ މުހިންމު އެކަކު އަދި ހައްޔަރު ނުކުރެވޭ ކަމަށާއި ބެލެވޭ ގޮތުގައި އެއީ އައިއީޑީ ގޮއްވާލި މީހާ ކަމަށް ވެސް ސީޕީ ހަމީދު ވިދާޅުވިއެވެ. އެ މީހާ ހޯދުމުގައި އެހީތެރިވެދިނުމަށް ފުލުހުން ވަނީ އާންމުންގެ އެހީތެރިކަމަށް އެދިލައްވާފައެވެ. އެގޮތުން އެ މީހާއާ ބެހޭ މައުލޫމާތު ލިބިފައިވާނަމަ 9704000 އަށް ގުޅުއްވާ މައުލޫމާތު ހިއްސާ ކުރެއްވުމަށް ފުލުހުން އެދިލައްވާފައިވެއެވެ. އަދި އެފަދައިން މައުލޫމާތު ހިއްސާ ކުރާ ފަރާތްތަކުގެ ވަނަވަރު ސިއްރު ކުރެވޭނެ ކަމަށް ވެސް ފުލުހުން ވިދާޅުވެއެވެ.
