ކާފިއު ވަގުތުތަކުގައި ފުލުހުންނާއެކު ސިފައިންވެސް މަގުތަަކަށް
ކޮވިޑް-19 އިން ރައްކާތެރިވުމުގެ ގޮތުން މާލޭގައި އަޅައިފައިވާ ފިޔަވަޅުތައް ތަންފީޒް ކުރަން ފުލުހުންނާއެކު ސިފައިންވެސް މަގުތަކަށް ނިކުމެއްޖެއެވެ.
އެމްއެންޑީއެފްއިން ކުރި ޓްވީޓެއްގައި ވިދާޅުވީ މާލެ ސަރަހައްދުގައި އަޅައިފައިވާ ކޮވިޑް-19ގެ ފިޔަވަޅުތައް ތަންފީޒު ކުރުމުގައި ފުލުހުންނާ އެކު ސިފައިން ވެސް ހަރަކާތްތެރި ވަމުންދާނެ ކަމަށެވެ. މިވަގުތު މާލޭގެ އެކި ހިސާބުތަކުގައި ފުލުހުން ދަނީ ހަރަކާތްތެރިވަމުންނެވެ.
ސިފައިން މަގުތަކަށް ނިކުމެފައި މިވަނީ، ކޮވިޑް-19 އިން ރައްކާތެރިވުމަށް އެޗްޕީއޭއިން އަޅާފައިވާ ފިޔަވަޅުތައް ތަންފީޒުކުރަން ސަލާމަތީ ބާރުތައް ގުޅިގެން މަސައްކަތް ކުރެއްވުމަށް އިއްޔެ ރައީސް އެންގެވުމާ ގުޅިގެންނެވެ.
މިއަދުން ފެށިގެން ހަފްތާއަކަށް މާލޭ ސަރަހައްދުގައި ހަވީރު 04:00 ފަތިހު 04:00 ބޭރަށް ނުކުމެ އުޅުމަކީ މަނާކަމެކެވެ. އަދި މި މުއްދަތައް މިސްކިތްތަކުގައި ޖަމާއަތުގައި ނަމާދުކުރުން ވެސް މިވަނީ މެދުކަނޑާލާފައެވެ. މީގެއިތުރުން މާލޭ ސަރަހައްދުގެ ހޮޓާ ރެސްޓޯރަންޓްތަކުގައި މީހުން ވައްދައިގެން ކެއިން ބުއިމުގެ ހިދުމަތް ދިނުން ވެސް ވަނީ މަނާކޮށްފައެވެ.
ކޮމެންޓް