ޚިޔާނާތުގެ ލިސްޓުގައި ތިބި އެމްޑީޕީ މެމްބަރުންނާމެދު ފިޔަވަޅު އަޅަން އަދި ނިންމާފައެއް ނެތް: ހަސަން ލަތީފު

މޯލްޑިވްސް މާކެޓިންގް އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ގެ ބޮޑު ޚިޔާނާތާ ގުޅިގެން އެސެޓް ރިކަވަރީ ކޮމިޝަނުން އެކުލަވައިލި ރިޕޯޓުުގައި ހިމެނޭ އެމްޑީޕީގެ މެމްބަރުންނާމެދު ފިޔަވަޅު އަޅަން އަދި ނުނިންމާ ކަމަށް އެ ޕާޓީގެ ޗެއާޕާސަން ހަސަން ލަތީފް ވިދާޅުވެއްޖެއެވެ.

Ads by MWSC

ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީއާއި ޖުޑީޝަރީ ކޮމިޓީން އާންމުކުރި މި ލިސްޓަކީ އެސެޓް ރިކަވަރީ ކޮމިޝަނުގެ ހޯދުންތަކުގެ މައްޗަށް ބިނާކޮށް ކޮމިޝަނުން އެކުލަވާލާފައިވާ ލިސްޓެކެވެ. މި ލިސްޓުގައި 19 ވަނަ ރައްޔިތުންގެ މަޖިލީހުގައި ހިމެނޭ އެމްޑީޕީގެ 4 މެމްބަރުންގެ ނަން ވެސް ހިމެނިފައިވެއެވެ. އެއީ އެ ޕާޓީގެ ޕީޖީ ގްރޫޕްގެ ލީޑަރ މެދުހެންވޭރު ދާއިރާގެ މެމްބަރު އަލީ އާޒިމް އާއި މުލަކު ދާއިރާގެ މެމްބަރ އިބްރާހީމް ނަސީރުގެ އިތުރުން މަރަދޫ ދާއިރާގެ މެމްބަރ އިބްރާހީމް ޝަރީފް އަދި ކެނދިކުޅުދޫ ދާއިރާގެ މެމްބަރ އަހުމަދު އީސާއެވެ.

އެ ލިސްޓުގައި ހިމެނޭ އެމްޑީޕީގެ މެމްބަރުންނަށް ޕާޓީ ތެރެއިން ފިޔަވަޅު އަޅަން ނިންމާފައިވޭތޯ "ރާއްޖެއެމްވީ" އިން ސުވާލުކުރުމުން، ރައްޔިތުންގެ މަޖިލީހުގެ ހެންވޭރު ހުޅަނގު ދާއިރާގެ ޙަސަން ލަތީފު ވިދާޅުވީ ޕާޓީ ތެރެއިން އެ މެމްބަރުންނާ މެދު ފިޔަވަޅު އަޅަން ނިންމާފައި ނުވާ ކަމަށެވެ. ލިސްޓު އަދި އޮތީ ކޮމިޓީ މަރުޙަލާގައިކަން ވެސް ލަތީފު ފާހަގަ ކުރެއްވިއެވެ.