ނަޝީދަށް ދިން ހަމަލާއާ ގުޅިގެން އިންޓެލިޖެންސްގެ އޮޑިޓެއް
ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާއާ ގުޅިގެން އިންޓެލިޖެންސް އޮޑިޓެއް ހަދަން ނިންމާފައިވާ ކަމަށް ރައީސް އޮފީހުން ވިދާޅުވެއްޖެއެވެ.
ރައީސް އޮފީހުގެ ތަރުޖަމާނު މަބްރޫކް އަޒީޒް މިރޭ ކުރެއްވި ޓުވީޓެއްގައި ވިދާޅުވީ އިންޓެލިޖެންސްގެ އޮޑިޓް ހަދަނީ ރައީސް އޮފީހާއި އެޓާރނީ ޖެނަރަލް އޮފީސް ގުޅިގެން އުފައްދާފައިވާ ޓީމަކުން ކަމަށެވެ. އަދި ރައީސް ނަޝީދަށް ދިން ހަމަލާއާ ގުޅިގެން އިންޓެލިޖެންސްގެ މަސައްކަތް ހުރި ގޮތުގެ އޮޑިޓެއް ހެދުމުގެ މަސައްކަތް ފަށައިފައިވާ ކަމަށާއި އެ ޓީމުގެ މަސައްކަތްތައް ރައީސްއާ ހިއްސާ ކުރައްވާނެ ކަމަށް މަބްރޫކް ވިދާޅުވިއެވެ.
ރައީސް ނަޝީދަށް މިދިޔަ ހޮނިހިރު ދުވަހު ދިން ބޮމުގެ ހަމަލާއާ ގުޅޭ އެެއްވެސް އިންޓެލިޖެންސް މައުލޫމާތެއް ލިބިފައި ނުވާކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވަނީ ވިދާޅުވެފައެވެ. އަދި އެކަމާ ގުޅިގެން އެހާ ބޮޑު ހާދިސާއެއް ހިނގައިދިޔަ އިރު އިންޓެލިޖެންސް ފެއިލްވި ސަބަބު ބަލަން ޖެހޭ ކަމަށާއި އެމްއެންޑީއެފާއި ފުލުހުންގެ އިންޓެލިޖެންސްގެ އޮޑިޓެއް ހަދާނެ ކަމަށް ރައީސް އިބްރާހިމް މުހައްމަދު ސޯލިހު ވަނީ ވިދާޅުވެފައެވެ.
ރައީސް ނަޝީދަށް ދިން ހަމަލާއާ ގުޅޭ އިންޓެލިޖެންސް މައުލޫމާތު ނުލިބޭ ކަމަށް ސަލާމަތީ ބާރުތަކުން ވިދާޅުވާއިރު، އެ ހަމަލާގެ ކުރިން، އެފަދަ އަމަލެއް ހިންގަން ބަޔަކު ރާވާ ކަމުގެ މައުލޫމާތު ލިބިގެން ހުޅުދޫ ދާއިރާގެ މެންބަރު އިލްޔާސް ލަބީބު އެމްއެންޑީއެފްއަށް އަންގަވާފައިވާ ކަމަށް އޭނާ ވަނީ ވިދާޅުވެފައެވެ. އަދި އޭނާއަށް އެ މައުލޫމާތު ލިބުނީ އާންމުންގެ މީހެއްގެ ފަރާތުން ކަމަށާއި އެކަން މިނިސްޓަރު މާރިޔާ ދީދީއަށް ވެސް އަންގައިފައި ވާނެ ކަމުގައި އޭނާ ވިދާޅުވިއެވެ.
ނަޝީދަށް ދިން ހަމަލާއާ ގުޅިގެން މިހާތަނަށް ތިން މީހަކު ހައްޔަރުކޮށް، އެކަމާ ގުޅޭ ގިނަ މައުލޫމާތުތަކެއް ފުލުހުން ވަނީ އާންމުކޮށްފައެވެ. އަދި ތަހުގީގަށް ތިން މީހުން ބަންދުކޮށް އެ މީހުން ބަންދުގައި ބޭތިއްބުމަށް15 ދުވަހުގެ މުއްދަތެއް ކޯޓުން ވަނީ ދީފައެވެ
