ފައްސިވާ އަދަދުތައް ކޮންޓްރޯލު ވާ ކަމުގެ ނިޝާނެއް، މިއަދު 741 މީހުން
ކޮވިޑް-19 އިން ރައްކާތެރިވުމުގެ ގޮތުން އެޅި ހަރުކަށި ފިޔަވަޅުތަކުގެ ސަބަބުން ރާއްޖެއިން ފައްސިވާ އަދަދުތައް ކޮންޓްރޯލު ވަމުން އަންނަ ކަމަށް ފާހަގަ ކުރެވިއްޖެއެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާންމުކުރި ތަފާސް ހިސާބުތަކުން ދައްކާ ގޮތުގައި އިތުރު 741 މީހުން ވަނީ ރާއްޖެއިން ކޮވިޑް-19 އަށް ފައްސިވެފައެވެ. އޭގެތެރެއިން 515 މީހުންނަކީ އިއްޔެގެ އިރުއޮއްސި 6:00 އިން މިއަދުގެ އިރުއޮއްސި 6:00 އަށް ސާމްޕަލް ނެގުނު ފަރާތްތަށް ކަމަށް ވެސް އެޗްޕީއޭއިން ވިދާޅުވިއެވެ.
އެޗްޕީއޭގެ ހިސާބުތަކުން ދައްކާ ގޮތުގައި މިއަދު މާލެއިން ފައްސިވީ 560 މީހުންނެވެ. އަދި އަތޮޅުތެރެއިން 156 މީހުންނާއި ހިންގަމުން އަންނަ ރިސޯޓުތަކުން 25 މީހުން ފައްސި ވެފައިވެއެވެ.
މިހާރު ރާއްޖެއިން ކޮވިޑް-19އަށް މުޅިއަކު ފައްސިވެފައިވަނީ 44،523 މީހުންނެވެ.
ބަލިން ފަސޭހަވެފައިވަނީ 28،459 މީހުންނެވެ. އަދި މި ބަލީގައި ރާއްޖެއިން މިހާތަނަށް ނިޔާވެފައި ވަނީ 97 މީހުންނެވެ.
ރާއްޖެއިން ކޮވިޑް-19 އަށް ހޮސްޕިޓަލުތަކުގައި މިވަގުތު ފަރުވާ ދެމުންދަނީ 262 މީހުންނަށެވެ.
Ads by STO
