ހަމަލާއާ ގުޅިގެން ހައްޔަރުުކުރި ފާތިހުއަކީ މީގެ ކުރިން ފުލުހެއް، ވަކިވީ އަމިއްލައަށް!
ރައްޔިތުން މަޖިލީހުގެ ރައީސް މުޙައްމަދު ނަޝީދަށް އަމާޒުކޮށް ދިން ބޮމުގެ ހަމަލައާ ގުޅިގެން ހައްޔަރު ކުރެވުނު މީހުންގެ ތެރެއިން ފާތިހުއަކީ މީގެ ކުރިން ފުލުހެއް ކަމަށާއި، އޭނާ ވަކިވީ ވެސް އަމިއްލައަށް ކަމަށް އެ މުއައްސަސާއިން ބުނެފިއެވެ.
އެހެން ނަމަވެސް އޭނާ ފުލުހެއްގެ ގޮތުގައި މަސައްކަތް ކުރީ ކިހާ މުއްދަތަކަށް ކަމެއް އަދި އެކަމާ ގުޅޭ އެއްވެސް އިތުރު މައުލޫމާތެއް ފުލުހުން ހިއްސާއެެއްް ނުކުރެއެވެ.
މައުލޫމާތު ލިބިފައިވާ ގޮތުގައި ފާތިހުއަކީ މީގެ ކުރިން މޯލްޑިވިއަންގެ ކެބިން ކުރޫއެއްގެ ވަޒީފާ ވެސް އަދާ ކޮށްފައިވާ މީހެކެވެ.
އޭނާ ހައްޔަރު ކޮށްފައިވަނީ މަހުގެ 19 ވަނަ ދުވަހު ބ. ދަރަވަންދޫގައި ފުލުހުން ހިންގި ޚާއްސަ އޮޕަރޭޝަނެއްގައެވެ. އަދި މިއާއެކު މިދިިޔަ ބުރާސްފަތި ދުވަހު އޭނާގެ ބަންދަށް ވަނީ 15 ދުވަހުގެ މުއްދަތެއް ޖަހައިފައެވެ.
ރައީސް ނަޝީދު ދިރިއުޅުއްވާ ގެކޮޅު ކައިރިން އެމަނިކުފާނަށް އަމާޒުކޮށް އެއްޗެއް ގޮއްވައިލި މައްސަލަ މިހާރު ވަރަށް ހަރުކަށި ކޮށް ފުލުހުން ތަހުގީގު ކުރަމުން އަންނަ އިރު، މިހައިތަނަށް ތިން މީހަކު ވަނީ ފުލުހުންގެ ބެލުމުގެ ދަށަށް ގެންގޮސްފައެވެ. އެއީ، އަދުހަމް އަހުމަދު، މއ.ފޭރުގެ، މުޖާޒް އަހްމަދު، 21އ އަދި ގއ. ކޮނޑޭ، ފޮޅޭމާ، ތަހްމީން އަހުމަދު، 32އ އެވެ.
މި ހަމަލާ އަމާޒުވި ރައްޔިތުން މަޖިލީހުގެ ރައީސް މުހައްމަދު ނަޝީދު، މިހާރު ހުންނެވީ ޖަރުމަނުގައެވެ. އަދި މިއަދު އެމަނިކުފާނު ފަރުވާ ކުރުމަށް ފަހު ޖަރުމަނު ހޮސްޕިޓަލުން ވަނީ ގެއަށް ފޮނުވާލައިފައެވެ.
