ނަޝީދަށް އަމާޒުކޮށް ދިން ހަމަލާ: 17 މީހަކު ހައްޔަރަށް، 4 މީހަކު ކޮވިޑް-19އަށް ފައްސި
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށްދިން ނުރައްކާތެރި ޓެރަރިސްޓް ހަމަލާއާއި ގުޅިގެން ހައްޔަރުކުރި 4 މީހުން ވެސް ކޮވިޑަށް ފައްސި ވެފައިވާކަމަށް މިނިސްޓަރ އޮފް ހޯމްއެފެއާޒް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ މިހެން ވިދާޅުވީ ރައްޔިތުންގެ މަޖީލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބު ދެއްވަމުންނެވެ.
މިނިސްޓަރ ވިދާޅުވީ ރައީސް ނަޝީދަށް އަމާޒުކޮށް ދިން ޙަމަލާގެ ތަހުޤީޤަށް ފުލުހުންގެ ތެރެއިން 450 އެއްހާ އޮފިސަރުން ޚާއްސަކޮށް މަސައްކަތް ކުރަމުންދާ ކަމަށެވެ. އަދި އެ މައްސަލައިގައި މިހާތަނަށް ގިނަ ކުރިއެރުންތަކެއް ހޯދިފައިވާ އިރު، ސީދާ މައްސަލައާ ގުޅުންހުރި 4 މީހަކާއި، ޓެރަރިޒަމްގެ ޙަމަލާތަކާ ގުޅޭ 14 މީހަކު ހައްޔަރު ކޮށްފައިވާ ކަމަށް މިނިސްޓަރ ވިދާޅުވިއެވެ. އަދި ތަހްޤީޤަށް އެކަށީގެންވާ ކުރިއެރުމެއް ލިބިފައިވާ ކަމަށް އޭނާ ވިދާޅުވިއެވެ.
"އެކަމަށް ފުލުހުންގެ ތެރެއިން އެންމެ ފުރަތަމަ 450 އެއްހާ އޮފިސަރުން ހާއްސަ ކުރެވި ތަހުގީގުކުރުމުގެ މަސައްކަތް ފެށި، މިއަދާ ހަމައަށް އައި އިރު އެކަށީގެންވާ ކުރިއެރުމެއް ލިބިފައި ވޭ،" އިމްރާން ވިދާޅުވިއެވެ.
އިތުރަށް ވާހަކަ ދައްކަވަމުން މިނިސްޓަރ ވިދާޅުވީ ރައީސް ނަޝީދަށް ހަމަލާ ދިން މައްސަލައިގެ ތަހްގީގް ކުރިއަށްދާ ސްޕީޑާ ދޭތެރޭ ހިތްހަމަޖެހިވަޑައި ނުގަންނަވާކަމަށާއި އެހެން ދިމާ ވަނީ ހައްޔަރުކުރި 4 މީހުން ވެސް ކޮވިޑަށް ފައްސިވެފައިވުމުން ކަމަށާއި އަދި ތަހްގީގުގައި މަސައްކަތް ކުރާ ގިނަ އޮފިޝަލުން ވެސް ފައްސިވެފައިވާކަމަށެވެ.
މިނިސްޓަރ އިމްރާން ވިދާޅުވީ ޓެރަރިޒަމާއި ގުޅުން ހުރި 14 މީހަކު ހައްޔަރުކޮށްފައިވާކަމަށެވެ. ޓެރަރިޒަމާ ދެކޮޅަށް ރާއްޖޭގެ އެކި ހިސާބުތަކުގައި ކުރިއަށްގެންދާ އޮޕަރޭޝަންތަކުގައި ބައެއް ގޭގެއާއި ތަންތަން ބަލާ ފާސް ކޮށް މީހުން ހައްޔަރު ކޮށްފައިވެއެވެ.
މޭ މަހުގެ 6 ވަނަ ދުވަހުގެ ރޭ ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދުގެ ހަށިކޮޅަށް އަމާޒުކޮށްގެން ދީފައިވާ ޓެރަރިސްޓް ހަމަލާއާ ގުޅިގެން، ކުރިޔަށްދާ ތަހުގީގާއި އެންމެހައި ކޯޓު މަރުހަލާތައް ގާތުން ބެއްލެވުމަށް ޓަކައި ރައީސުލްޖުމްހޫރިއްޔާގެ ޚާއްސަ މަންދޫބެއްގެ ގޮތުން އިނގިރޭސިވިލާތުގެ ރައްޔިތެއްކަމަށްވާ މިސްޓަރ އައްބާސް ފާއިޒް ވަނީ ހަމަޖައްސަވަފާއެވެ.
