މާލެއިން މަހަށް ފުރާ ފަރާތްތަކަށް ހާއްސަ ހުއްދައެއް ދޫކުރަނީ
މާލެ ސިޓީގައި މިހާރު އަޅައިފައިވާ ޚާއްސަ ފިޔަވަޅުތަކުގެ ތެރެއިން މާލެ ސިޓީން މަހަށް ފުރާ ފަރާތްތަކަށް ހާއްސަ ހުއްދައެއް ދޫކުރުމަށް ސިޓީ ކައުންސިލުން ނިންމައިފިއެވެ.
މާލެ ސިޓީ ކައުންސިލުން ވިދާޅުވީ މަސްވެރި އުޅަނދުފަހަރުގައި މަހަށް ފުރާ ފަރާތްތަކުން ކޮންމެ ދުވަހެއްގެ ހެދުނު 8:00 އިން ފެށިގެން ހުއްދައަށް އެދެވޭނެ ކަމަށެވެ. އަދި ސިޓީ ކައުންސިލްގެ ވެބުސައިޓްގައި އެކަމަށް ޚާއްޞަކޮށްފައިވާ ޕޯޓަލްއިން ހުއްދައަށް އެދެވޭނެ ކަމަށް ވެސް އެ ކައުންސިލުން ވިދާޅުވެއެވެ.
މާލެ ސިޓީ ކައުންސިލްގެ ވެބުސައިޓަކީ https://malecity.gov.mv އެވެ.
ކޮވިޑް-19 އާއި ގުޅިގެން ހެލްތް ޕްރޮޓެކްޝަން އެޖެންސީ، އެޗްޕީއޭއިިން އަޅައިފައިވާ ޚާއްޞަ ފިޔަވަޅުތަކުގެ ތެރޭގައި އެއް ރަށުން އަނެއް ރަށަށް ދަތުރުކުރުން ވަނީ މަނާކޮށްފައެވެ. އަދި ދެ ހަފްތާ ވަންދެން، މާލެ ސަރަޙައްދުގެ ކާފިއު ގަޑި ހަވީރު 4:00 އިން އަނެއް ދުވަހުގެ ހެނދުނު 8:00 އަށް އިތުރުކޮށް، ކާފިއު ނޫން ގަޑިތަކުގައި ވެސް ބޭރަށް ނިކުމެވޭނީ ކޮންމެ ގޭބިސީއަކުން (ރެސިޑެންޝަލް ހުއްދަ އޮންނަ) ދެ މީހަކަށް ކަމަށް ވެސް ވަނީ ނިންމައިފައި ވެއެވެ.
