ކޮވިޑް-19އަށް ފައްސިވާ މީހުންނަށް ރިލީޒް ޑޮކިއުމެންޓް ދިނުން ހުއްޓައިލައިފި
ކޮވިޑް-19އަށް ފައްސިވާ މީހުންނަށް ރިލީޒް ޑޮކިއުމެންޓް ދިނުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހުއްޓައިލައިފިއެވެ.
ޑިރެކްޓާ ޖެނެރަލް އޮފް ޕަބްލިކް ހެލްތު މައިމޫނާ އަބޫބަކުރު ސޮއި ކުރައްވާ މިއަދު ނެރުއްވި އިއުލާނެއްގައި ވިދާޅުވެފައި ވަނީ ކޮވިޑް-19 އަށް ފައްސިވުމާ ގުޅިގެން އެކަހެރިކުރާ މީހުންނަށް އެކަހެރިވުމަށް އަންގާ ލިޔުމުގެ އިތުރުން، އެކަހެރިވުމުގެ މުއްދަތު ހަމަވުމުން މިހާރު ދޫކުރަމުންދާ ރިލީސް ޑޮކިއުމެންޓް ދޫ ނުކުރާ ގޮތަށް ހަމަޖެހިފައިވާ ކަމަށެވެ.
ކޮވިޑް-19އަށް ފައްސިވުމާ ގުޅިގެން އެކަހެރިވުމަށް ދޫކުރާ ލިޔުމުގައި އެކަހެރިވުމަށް ކަނޑައަޅާފައިވާ މުއްދަތު ހިމެނޭނެ ކަމަށާއި އެ ލިޔުމުގައި ބަޔާންކޮށްފައިވާ ގޮތުގެ މަތިން އެމީހަކު އެކަހެރިވެފައިވާ މުއްދަތު ނިމުމަކަށް އަންނާނެ ކަމަށް ވެސް އެޗްޕީއޭގެ އިއުލާނުގައިވެއެވެ.
"ފައްސިވާ މީހުންގެ ބަލިހާލަތާ ގުޅިގެން އެކަހެރިވެ ހުންނަ މުއްދަތު ތަފާތު ވާނެއެވެ. މިގޮތުން 14 ދުވަހުގެ މުއްދަތު ނިމޭއިރު ވެސް ހުން އައުން، ނޭވާލާން އުނދަގޫވުން، ކެއްސުން ގޯސްވުން ފަދަ ކަންކަން ހުންނަ ނަމަ، އެކަހެރިވާ މުއްދަތު 21 ދުވަހަށް ދެމިގެން ދާނެއެވެ." އެޗްޕީއޭގެ އެންގުމުގައިވެއެވެ.
އެޗްޕީއޭ އިން އިތުރަށް ވިދާޅުވެފައި ވަނީ ފަރުވާ ދިނުމަށް މެޑިކަލް ފެސިލިޓީއެއްގައި ހުރި މީހެއް ނަމަ އެކަހެރިކުރެވޭ މުއްދަތު 14 ދުވަހަށް ވުރެ އިތުރު ވާނެ ކަމަށާއި މިފަދަ މީހުންގެ އެކަހެރި ކުރެވޭ ޖުމްލަ މުއްދަތު ބަޔާން ވާނީ ޑޮކްޓަރުން އިރުޝާދު ދޭ ގޮތުގެ މަތިން ކަމަށެވެ.
