އެމްއެންޑީއެފްގެ އެސްޕީޖީއަށް ބަދަލުތަކެއް ގެންނަން ރައީސް ޞާލިޙް އަންގަވައިފި
ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ދިން ޓެރަރިސްޓް ޙަމަލައާ ގުޅިގެން، އެމްއެންޑީއެފްގެ ސްޕެޝަލް ޕްރޮޓެކްޝަން ގްރޫޕް (އެސްޕީޖީ)އަށް ބަދަލުތައް ގެންނަން ޖެހޭ ކަމަށް ދެކިވަޑައިގެން އެކަން މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް އަންގަވައިފިއެވެ.
ރައީސް އޮފީހުގެ ތަރުޖަމާނު މަބްރޫކް ޢަބްދުލްއަޒީޒް މިއަދު ވިދާޅުވީ ދައުލަތުގެ އިސްވެރިންނަށް ފޯރުކޮށްދޭ ސެކިއުރިޓީ އިތުރަށް ހަރުދަނާ ކުރުމުގެ ގޮތުން މޯލްޑިވްސް ނޭޝަނަލް ޑިފެންސް ފޯރސްގެ ސްޕެޝަލް ޕްރޮޓެކްޝަން ގްރޫޕަށް ބަދަލުތައް ގެންނަން ޖެހޭ ކަމަށް ދެކިވަޑައިގެން އެކަން މިނިސްޓަރ އޮފް ޑިފެންސް އަލްއުސްތާޛާ މާރިޔާ އަޙްމަދު ދީދީއަށް މިމަހުގެ ހަވަނަ ދުވަހު ރައީސުލްޖުމްހޫރިއްޔާ އަންގަވާފައިވާ ކަމަށެވެ.
އެމްއެންޑީއެފްގެ އެސްޕީޖީއަށް ބަދަލުތަކެއް ގެނައުމަށް ރައީސް ޞާލިޙް އަންގަވާފައިވީ ނަމަވެސް، އެކަމާ ގުޅޭ އިތުރު ތަފްސީލެއް އަދި ހާމަ ކުރައްވައިފައެއް ނުވެއެވެ.
ރައީސް ނަޝީދުއަށް ދިން ހަމަލާއާ ގުޅިގެން އެ މަނިކުފާނަށް ލިބިވަޑައިގަތް އަނިޔާތަކަށް އޭޑީކޭ ހޮސްޕިޓަލުގައި ވަނީ ފަރުވާ ހޯއްދަވައިފައެވެ. އެގޮތުން 16 ގަޑިއިރު ތެރޭގައި އެމަނިކުފާނުގެ 4 އޮޕަރޭޝަނެއް ކުރެއްވިކަން އޭޑީކޭގެ ޑޮކްޓަރުންގެ ޓީމުން ވިދާޅުވިއެވެ.
މި ހަމަލާގެ ތުހުމަތުގައި ފުލުހުން ވަނީ މިހާތަނަށް ހަތަރު މީހަކު ހައްޔަރު ކޮށްފައެވެ.
