އެޕަލް ޓީވީން ދައްކާ ފުރަތަމަ ހިންދީ ފިލްމަކަށް "ރާދޭ"
އެޕަލް ޓީވީން ދައްކާ ހިންދީ ފުރަތަމަ ފިލްމަކަށް ސަލްމާން ޚާންގެ "ރާދޭ: ޔުއަރ މޯސްޓް ވޯންޓެޑް ބާއީ" ވެއްޖެއެވެ.
މެއި މަހުގެ 15 ވަނަ ދުވަހު ޕްރިމިއަރ ކުރި ފިލްމު "ރާދޭ: ޔުއަރ މޯސްޓް ވޯންޓެޑް ބާއީ" އަކީ އާންމުންގެ ތެރެއިން ގިނަ ބައެއްގެ މަގުބޫލުކަން ހޯދައިފައިވާ ފިލްމެކެވެ. އެޕަލް ޓީވީން ދައްކާ ފުރަތަމަ ފިލްމަކަށް "ރާދޭ: ޔުއަރ މޯސްޓް ވޯންޓެޑް ބާއީ" ވެފައިވާއިރު، މިއީ ބޮލީވުޑްގެ ފިލްމުތަކުގެ ތެރެއިން ވެސް އެޕަލް ޓީވީން ފެނިގެން ދާ ފުރަތަމަ ފިލްމެވެ.
ޕްރަބޫ ދޭވާ ޑައިރެކްޓް ކޮށްފައިވާ މި ފިލްމު 65 ޤައުމެއްގައި މިހާރު ބެލޭނެއެވެ. ޕްރޮޑިއުސަރުން ދަނީ 100 އަށް ވުރެ ގިނަ ޤައުމަށް ފިލްމު ފެންނާނެ ގޮތްތައް ރާވަމުންނެވެ.
މި ފިލްމު ޕްރިމިއަރ ކުރިތާ މާގިނަ ދުވަހެއް ނުވެ، އިންޓަނެޓުގައި ފުލް އެޗްޑީކޮށް ފިލްމު ލީކް ވެސް ވިއެވެ. މިކަމާ ގުޅިގެން ސަލްމާން ހާން ވަނީ އެކި ސައިޓުތަކަށް ވަދެ، ފިލްމު ނުބެލުމަށް އާންމުންނަށް އިލްތިމާސްކޮށްފައެވެ. އަދި އެފަދަ ސައިޓުތަކުން ފިލްމާއި ވީޑިއޯތައް ލީކުކުރުމަކީ ގާނޫނީ ކުށެއް ކަމަށް ވެސް ސަލްމާން ހާން ވަނީ ބުނެފައެވެ.
"ރާދޭ: ޔުއަރ މޯސްޓް ވޯންޓެޑް ބާއީ" ގައި ސަލްމާން އާއި އެކު ލީޑް ރޯލުން ފެނިގެންދާނީ ދިޝާ ޕަޓާނީ އެވެ. އަދި މީގެ އިތުރުން ރަންދީޕް ހޫޑާއާއި ޖެކީ ޝްރޯފް އަދި މެގާ އާކާޝްވެސް މިފިލްމުގެ މުހިއްމު ބައިތަކުން ފެނިގެންދެއެވެ. ޕްރަބޫދޭވާ ޑައިރެކްޓްކުރި "ރާދޭ" އަކީ 2017 ގައި ރިލީޒްކުރި ކޮރެއާ ފިލްމު "ދި އައުޓްލޯސް" އަށް ބިނާކޮށް ހެދި ފިލްމެކެވެ. ފިލްމުގެ ސްކްރީންޕްލޭ ލިޔުނީ އޭސީ މުގިލް އާއި ވިޖޭ މޯރިއާ އެވެ
