ކެފޭ ރެސްޓޯރަންޓްތަކަށް ގެއްލުމުގެ ބަދަލު ދޭން ނުފެންނަ ކަމަށް ނިންމައިފި
ކޮވިޑް-19އާ ގުޅިގެން ކެފޭ ރެސްޓޯރަންޓްތައް ބަންދު ކުރުމުން ލިބުނު ގެއްލުމުގެ ބަދަލު ދޭން ނުފެންނަ ކަމަށް ރައްޔިތުންގެ މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީން ނިންމައިފިއެވެ.
މިގޮތަށް ނިންމީ، ހޯރަފުށީ ދާއިރާގެ މެމްބަރު އަހުމަދު ސަލީމް މިއަދުގެ މަޖިލީހަށް ހުށައެޅުއްވި މައްސަލަ ދިރާސާ ކުރުމަށް ފަހުގައެވެ.
މެމްބަރު ސަލީމް ހުށައެޅުއްވީ ކުއްލި ނުރައްކަލުގެ ހާލަތުގެ ތެރޭގައި ކެފޭ ރެސްޓޯރެންޓްތަކަށް އެޅި ފިޔަވަޅުތަކުގެ ސަބަބުން އާމްދަނީއަށް ލިބުނު ގެއްލުމަށް އެކަށީގެންވާ ބަދަލެއް ދިނުމަށެވެ.
ނަމަވެސް ކަމާ ބެހޭ ފަރާތްތަކާ އެކު މަޝްވަރާކޮށް، ކޮމިޓީއަށް ލިބުނު މައުލޫމާތުގެ އަލީގައި އެއީ އެންމެ ރަނގަޅު ގޮތެއް ނޫން ކަމަށް އެ ކޮމިޓީން ވަނީ ފާހަގަ ކޮށްފައެވެ.
އެއީ މިއަހަރުގެ ބަޖެޓުގައި ވެސް އެފަދަ ކަމެއް ހަމަޖެއްސުމަށް ބަޖެޓް ކުރެވިފައި ނުވުމާއި އެފަދަ ޚަރަދެއް ހަމަޖެއްސުމަކީ ބަޖެޓަށް ނޭދެވޭ އަސަރުކޮށް، އަންދާޒާކޮށްފައިވާ ޑެފިސިޓް ބޮޑުވެ، ފައިނޭންސިންގ ހޯދަން ޖެހޭ މިންވަރު އިތުރުވާނެ ކަމެއްގެ ގޮތުގައި ފެންނަ ކަމަށް އެ ކޮމިޓީން ބުނެފައިވެއެވެ.
މަޖިލީހުގެ ގައުމީ ތަރައްގީއާއި ތަރިކައިގެ ކޮމިޓީގެ އިތުރު ހުށައެޅުންތަކުގެ ތެރޭގައި އެ ވިޔަފާރިތައް ދިގު މުއްދަތަކަށް ދެމެހެއްޓުމަށް ޓަކައި ފަހި މާހައުލެއް ގާއިމުކޮށްދިނުމަށާއި ފަންނީ ގާބިލުކަން އިތުރުކުރުމަށް ބޭނުންވާ އެހީތެރިކަމާއި ތަމްރީނު ޕްރޮގްރާމްތައް ބައްޓަންކޮށް، އެ ފުރުސަތު ހުޅުވައިލުމަށް ވެސް ހިމަނައިފައިވެއެވެ.
