ކޮވިޑަށް ފައްސިވާ މީހުންނަށް އޭޑީކޭއިން ދޭ ޚިދުމަތްތައް ފުޅާކޮށްފި
ކޮވިޑް-19އަށް ފައްސިވާ މީހުން އެނދުމަތި ކޮށްގެން ފަރުވާ ދޭ ގޮތަށް، އޭޑީކޭ ހޮސްޕިޓަލްގެ ޚިދުމަތްތައް ފުޅާކޮށްފިއެވެ.
އޭޑީކޭއިން ފުލޫ ކްލިނިކްގެ ޚިދުމަތް މިހާރު ވެސް ދެމުން ގެންދާއިރު، އެ ހޮސްޕިޓަލުގައި އެ ޚިދުމަތް ދެވެން ފެށުނީ، ރާއްޖޭގައި ކޮވިޑްގެ ހާލަތު ގޯސްވެ، ހިދުމަތްތަކާ މެދު ރައްޔިތުން ކަންބޮޑުވުން ފާޅު ކުރަމުން ދިޔަ ދަނޑިވަޅެއްގައެވެ.
އޭޑީކޭގެ މެނޭޖިން ޑިރެކްޓަރު އަހްމަދު އައްފާލް ވިދާޅުވީ ކޮވިޑަށް ފައްސިވާ މީހުން އެނދުމަތި ކޮށްގެން ފަރުވާދޭ ގޮތަށް އެ ހޮސްޕިޓަލުގައި ހިދުމަތްތައް ފުޅާ ކުރެވިފައިވާ ކަމަށާއި، ފައްސިވާ މީހުން އެނދުމަތި ކުރާނީ އާންމު ހިދުމަތްތައް ފޯރުކޮށްދޭ ސަރަހައްދާ ވަކިން، އެކަމަށް ހާއްސަ ކޮށްފައިވާ ސަރަހައްދެއްގައި ކަމަށެވެ.
މީގެ އިތުރުން ކޮވިޑާ ގުޅިގެން އޭޑީކޭގައި އެނދުމަތި ވާން ބޭނުންވާ ފަރާތްތަކުން އަމަލު ކުރަން ޖެހޭ ގޮތް ހިއްސާ ކުރައްވަމުން އައްފާލް ވިދާޅުވީ ހޮސްޕިޓަލަށް ދިއުމުގެ ކުރިން ހިދުމަތް ހޯދާން އޭޑީކޭއަށް ގުޅައި، ބަލި މީހާގެ މައުލޫމާތު ހިއްސާ ކުރަން ޖެހޭނެ ކަމަށެވެ. އަދި އޭގެ ފަހުން އެމީހާއަކީ ހޮސްޕިޓަލްގައި ބާއްވައިގެން ފަރުވާ ދޭން ޖެހޭ ކަމަށް ފެންނަ މީހެއް ނަމަ އެނދުމަތި ވާން އޭޑީކޭއިން ގުޅާނެ ކަމަށް އައްފާލް ވިދާޅުވިއެވެ.
އޭޑީކޭގެ ހިދުމަތްތަކަށް ނަގާ ފީތައް އެނދުމަތި ކުރާ ކޮވިޑްގެ ބަލި މީހުން އަތުން ވެސް ނަގާނެ ކަމަށާއި، ކޮވިޑުގެ ފަރުވާއަށް ދޭ ބޭހާއި އާސަންދައިގެ ތެރެއިން ލިބޭ އެހެނިހެން ބޭސްތައް އެ އޮންނަ އިންތިޒާމެއްގެ ތެރެއިން ލިބޭނެ ކަމަށް ވެސް އައްފާލް ފާހަގަ ކުރެއްވިއެވެ. އަދި އެނދުމަތި ކުރާ ބަލި މީހުންނާއި އެހީތެރިންނަށް ވެސް ކެއުމާއި ބުއިމުގެ އިންތިޒާމު ،ފީއަކާ އެކު ހަމަޖައްސައިދޭނެއެވެ.
ހަމައެއާއެކު އޭޑީކޭގައި އެނދުމަތި ކުރާ ބަލި މީހާއާ އެކު އެމީހާ ބޭނުންވާ އެހީތެރިއަކަށް މަޑުކުރެވެއެވެ. އެމީހާއަކީ އެހެން އެއްވެސް ބައްޔަކަށް ފަރުވާ ހޯދަމުން ނުގެންދާ، ސިއްހަތު ރަނގަޅު މީހަކަށް ވާން ޖެހޭނެ ކަމަށް ވެސް އައްފާލް ވިދާޅުވިއެވެ.
Ads by STO
