ހިސާން ހުށަހެޅި އިސްލާހުން މުޖުތަމައުގައި ރުޅިވެރިކަމާ ނަފުރަތު ބޮޑު ވާނެ: އަދާލަތު
ރައްޔިތުންގެ މަޖިލީހުގެ ތުޅާދޫ ދާއިރާގެ މެންބަރު ހިސާން ހުސެއިން ދިވެހިރާއްޖޭގެ ގާނޫނުލްއުގޫބާތަށް ހުށަހަޅުއްފައިވާ އިސްލާހުގެ ސަބަބުން މުޖުތަމައުގައި ނަފްރަތާ ރުޅިވެރިކަން ބޮޑުވާނެ ކަމަށް އަދާލަތު ޕާޓީން ބުނެފިއެވެ.
އެގޮތުން އެ ޕާޓީއިން މިއަދު ނެރުނު އިލްމީ ދިރާސާގައި ވަނީ ދިވެހިރާއްޖޭގެ ގާނޫނުލްއުގޫބާތަށް މޭ 25، 2021 ވަނަ ދުވަހު ހިސާން ހުށަހެޅުއްވި އިސްލާހުތަކަކީ އިސްލާމީ ޝަރީއަތާ، ދިވެހިރާއްޖޭގެ ޖުމްހޫރިއްޔާގެ ގާނޫނު އަސާސީއާ، ބައިނަލްއަގުވާމީ ހަމަތަކާ، ދިވެހިރާއްޖެ ބައިވެރިވާ ބައިނަލްއަގުވާމީ މުއާހަދާތަކުން ލާޒިމުކުރާ އިލްތިޒާމްތަކާ ހިލާފު މުޖުތަމައުގައި ނަފްރަތާ ރުޅިވެރިކަން އިތުރުވުމަށް މަގުފަހިވުމުގެ ފުރުސަތު ބޮޑު އިސްލާހުތަކެއް ކަމަށް ބުނެފައެވެ.
އަދާލަތު ޕާޓީއިން ބުނެފައި ވަނީ ނަފްރަތުގެ އަމަލު ހުއްޓުވަން ޖެހޭނީ އޭގެ ސަބަބުން މުޖުތަމައުގައި ފިތުނަ ފަސާދައާއި ބައިބައިވުން އުފެދި އިޖުތިމާއީ ހަމަތައް ގެއްލިގެން ހިނގައިދާނެ ކަމަށް ޓަކައި ކަމަށެވެ. އަދި މުޖުތަމައުގެ ވިލުންވެރިކަމާއި މަސަލަސްކަން އިތުރުކޮށް އިސްލާމީ މުޖުތަމައުތަކުގައި ހިފަހައްޓަން ޖެހޭ ރީތި އަހުލާގީ ހަމަތައް ހިފެހެއްޓުމަށް ޓަކައި ނަފްރަތުގެ އަމަލުތަކާ ބަސްމަގަށް ސަމާލުވާން ޖެހޭ ކަމަށް ވެސް އެ ޕާޓީއިން ބުނެފައިވެއެވެ.
މީގެ އިތުރުން މި ބާވަތުގެ މައްސަލަތަކުގައި އދ ފަދަ ބައިނަލްއަގުވާމީ ޖަމާއަތްތަކުން ބިޔާންކޮށްފައިވާ ގޮތަށް އަމަލު ނުކޮށްފިނަމަ އަސާސީ މަގުސަދުތައް ހާސިލުވުމަށް ހުރަސްއެޅިގެން ދާނެ ކަމަށާ،އި މުޖުތަމައުގެ ހަމަޖެހުން ގާއިމު ކުރުމަށް ވެސް ދަތިވެގެން ދާނެ ކަމަށް ސަރުކާރު ކޯލިޝަނުގައި ހިމެނޭ އަދާލަތު ޕާޓީއިން ވަނީ ބުނެފައެވެ.
