ކޮވިޑްގެ މަރުތައް މަދު، ފެއިލްވި ކަމަކަށް ގަބޫލެއް ނުކުރަން: ރައީސް
ކޮވިޑް ޖެހިގެން ރާއްޖެއިން މަރުވި މީހުންގެ އަދަދު ގިނަ ނޫން ކަމަށާއި ކޮވިޑުގެ ހާލަތު މެނޭޖު ކުރުމުގައި ފެއިލްވީކަމަށް ގަބޫލުފުޅު ނުކުރައްވާކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
މިއަދު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އެމަނިކުފާނު ވިދާޅުވީ ކޮވިޑްގައި ފެއިލް ނުވާކަމަށް އެމަނިކުފާނު ވިދާޅުވީ ދުނިޔޭގެ އެހެން ގައުމުތަކާ އަޅައި ބަލާއިރު ރާއްޖޭގައި ދެވޭ ޚިދުމަތްތައް އެހާ ގޯސް ކަމަށް ނުބެލެވޭތީ ކަމަށެވެ.
ރައީސް އިތުރަށް ވިދާޅުވީ މި ބަލީގައި މީހުން މަރުވި އަދަދު ވެސް، އެހެން ގައުމުތަކާ އަޅައިބަލާއިރު ގޯސް ކަމަކަށް ދެންނެވޭކަށް ނެތް ކަމަށެވެ. އެގޮތުން މި އަދަދުތަކުގައި ހިފެހެއްޓިފައި ހުރީ ރާއްޖެ ފަދަ މަދު ގައުމަކަށް ކަމުގައި އެމަނިކުފާނު ފާހަަގަ ކުރެއްވިއެވެ.
" މި ބަލީގައި އެއްވެސް މީހަކު މަރުވެ ދިއުމަކީ، އެއީ ފޫނުބެއްދޭ ވަރުގެ ކަމެއް. އެހެން ނަމަވެސް އެހެން ގައުމުތަކާ އަޅައި ބަލާއިރުގައި އެ އަދަދުތައް ވެސް މިއުޅެނީ، ރަނގަޅު، އަޅުގަނޑު މި ދަންނަވާހެން ގޯސް އަދަދެއް ނޫން ފެންނަން ހުރީކީ." ކޮވިޑް-19ފަދަ ކަންކަމަކީ 100 އަހަރުން އެއް ފަހަރު ކުރިމަތިވާފަދަ ކަމެއް ކަމުގައި ފާހަގަ ކުރައްވަމުން ރައީސް ވިދާޅުވިއެވެ.
އިތުރަށް ރައީސް ވިދާޅުވީ އެއްވެސް ގައުމަކަށް ކޮވިޑް-19ގެ ބަލިމަޑުކަމަށް އެވަރަށް ތައްޔާރު ވެވިފައި ނެތް ކަމަށެވެ. އަދި އެހެންކަމުން ކުއްލިއަކަށް އަންނަ "ސަރޖް"ތަކުގައި ބައެއް ކަހަލަ ކަންތައްތައް އަތްދަށުން ގޮސްފައި އެބަހުރިކަން ވެސް އެމަނިކުފާނު ފާހަގަ ކުރެއްވިއެވެ.
"އެއަށް ބަލާފަ އެކަންކަން ރަނގަޅު ކުރަމުން އަޅުގަނޑުމެން މިގެންދަނީ، އިރާދަކުރެއްވިއްޔާ މިހާރު މިދާ މިސްރާބަށް އަޅުގަނޑުމެންނަށް މަސައްކަތްތައް ކުރެވޭ ކަމަށް ވަނީ ވިއްޔާ ދާދި އަވަހަށް ނިއު ނޯމަލެއްގައި ދިރިއުޅެއް ފެށޭނެ ކަމަށް ގަބޫލު ކުރެވެނީ" ރައީސް ވިދާޅުވިއެވެ.
ރާއްޖެއިން ކޮވިޑް-19 ޖެހިގެން މިހާތަނަށް 189 މީހަކު ވަނީ ނިޔާވެފައެވެ. އަދި މީގެ ހަފްތާއެއް ކުރިން ޖޫން މަހުގެ 2 ވަނަ ދުވަހު 10 އަހަރުގެ ކުއްޖަކު ވެސް މި ބަލީގައި ނިޔާވެފައިވާއިރު އެ ކުއްޖާގެ މަރުގައި ގިނަ އިހުމާލުތަކެއް ކުރި ކަމަށް ސަރުކާރުން ވެސް ވެސް ވަނީ އެއްބަސް ވެފައެވެ. އަދި ހެލްތު މިނިސްޓްރީގެ ރިޕޯޓުން ވެސް އެކަން ވަނީ ސާބިތުވެފައެވެ.
ފާއިތުވެދިޔަ މެއި މަހު އެކަނި ވެސް 89 މީހަކު ވަނީ މި ބަލީގައި ދުނިޔެ ދޫކޮށްފައެވެ. އެ މަހުގެ 24ވަނަ ދުވަހު 13 މީހަކު މި ދުނިޔެ ދޫކޮށްފައިވެއެވެ. އެއީ މި ބަލީގައި އެންމެ ގިނަ މީހުން މަރުވި ދުވަހެވެ.
ރައީސަށް އެނގިވަޑައި ނުގަންނަވަނީތޯ އެހެން ގައުމު ތަކާއި ރާއްޖޭގެ އާބާދީ.
ފެެއިލްވީ، އަދަދުތައް ދަށަައް ދިޔަނަމަވެސް ދެން ކިތައްމީހުންނަށް އާއިލާމީހުން ކައިރިއަށް ނުދެވި ތިބެން މިިޖެހެނީ…. އެ މީހުންގެ ހައްގު ކޮބާ؟