ކޮވިޑްގައި މަރުވި 20 އިންސައްތަ މީހުންނަކީ އިތުރު ބައްޔެއް ނެތް މީހުން: ޑރ.ޝަހީދު
ރާއްޖެއިން ކޮވިޑް-19 ގައި ނިޔާވި މީހުންގެ ތެރެއިން 20 އިންސައްތަ މީހުންނަކީ އިތުރު އެއްވެސް ބައްޔެއް ނެތް މީހުން ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)އިން ވިދާޅުވެއްޖެއެވެ.
އެޗްއީއޯސީއިން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަފުޅުދައްކަވަމުން ޓެކްނިކަލް އެޑްވައިޒަރީ ގްރޫޕުގެ މެމްބަރު ޑރ. އަހުމަދު ޝަހީދު ވިދާޅުވީ، ކޮވިޑް ބަލީގައި ނިޔާވި މީހުންގެ ތެރޭގައި ގިނައީ ހައި ރިސްކް މީހުން ކަމަށެވެ.
ޑރ. ޝަހީދު ވިދާޅުވީ ނިޔާވި މީހުންގެ ތެރޭގައި އާންމުކޮށް ހުރި ބަލިތަކުގެ ތެރޭގައި ހަކުރު ބަލި، ލޭ މައްޗަށް ދިޔުން، ކެންސަރު ބަލި، ހިތުގެ ބަލި އަދި ސްޓްރޯކް ހިމެނޭ ކަމަށެވެ. މީގެ ތެރެއިން އެންމެ ގިނަ އަދަދަކަށް ނިޔާވެފައި ވަނީ ލޭ މައްޗަށް ދާ މީހުންނެވެ. ނިޔާވި މީހުންގެ ތެރެއިން 56.8 އިންސައްތަ މީހުންނަކީ ލޭ މައްޗަށް ދާ މީހުން ކަަމަށް އެޗްއީއޯސީން ވިދާޅުވިއެވެ.
މީގެ އިތުރުން ޑރ.ޝަހީދު ވިދާޅުވީ ނިޔާވި މީހުންގެ ތެރެއިން ގާތްގަޑަކަށް ވިހި އިންސައްތަ މީހުންގެ އެއްވެސް ބައްޔެއް ނެތް ކަމަށެވެ.
"ގާތްގަނޑަކަށް 20 ޕަސެންޓް މީހުން އެއްވެސް ބައްޔަކަށް ފަރުވާ ނުހޯދައި މީހުން. އަޅުގަނޑުމެން އެބޭފުޅުންގެ ރިކޯޑްސްތައް ބެލިން. އެއްވެސް ކަހަލަ ބައްޔެއް ހުރި ކަމަކަށް ފާހަގައެއް ނުކުރެވޭ." ޑރ. ޝަހީދު ވިދާޅުވިއެވެ.
އެޗްއީއޯސީން ތައްޔާރުކޮށްފައިވާ ނިޔާވި މީހުންގެ ބަލިތައް ހިމެނޭ ޗާޓް ދައްކާ ގޮތުގައި ދެވަނައަށް އެންމެ ގިނައިން ނިޔާވެފައި ވަނީ ހަކުރު ބަލި ހުރި މިހުންނެވެ. އެ ބަލި ހުރި 38.7 އިންސައްތަ މީހުން ފާހަގަ ކުރެވިފައިވެއެވެ.
މިހާރު ރާއްޖެއިން 69،536 މީހުން ކޮވިޑަށް ފައްސިވެފައިވާއިރު މި ބަލީގައި ނިޔާވި މީހުންގެ އަދަދު ވަނީ 200އާ ގާތްކޮށްފައެވެ.
Ads by STO
