އިންސާނާ ހިތްނޭދޭ ކަންކަން މާތްﷲ ލައްވަވައިފައި ވަނީ އިލާހީ މަތިވެރި ހިކުމަތަކަށް ޓަކައި: ހުތުބާ
ކޮވިޑް-19ގެ ބަލިމަޑުކަމަކީ ފަހުގެ ތާރީހެއްގައި އިންސާނުން ދުށް އެންމެ ނުރައްކާތެރި އެއް ބަލިމަޑުކަމެވެ. ދުނިޔޭގެ ބޮޑެތި ބާރުތައް ކަމަށް ދައުވާ ކުރާ ގައުމުތައް ވެސް މި ލޮލަށް ނުފެންނަ ވައިރަހުގެ ކުރިމަތީގައި ކުޑަކަކޫ ޖަހަން މަޖުބޫރުވީއެވެ. އަޅުގަނޑުމެންގެ ރާއްޖޭގައި ވެސް މި ބަލީގެ ނުރައްކާތެރިކަން މިވަނީ އިންތިހާއަށް ބޮޑުވެފައެވެ. މިއަދުގެ ހުކުރު ހުތުބާގައި އަލިއަޅުވައިލައްވައިފައިވާ މައުޟޫއުއަކީ “ބަލިމަޑުގެ ހާލަތުގައި މުސްލިމުން އަމަލު ކުރަންވީ ގޮތް” މިއެވެ.
ބޮޑު މުސީބާތެއް ނުވަތަ ބަލިމަޑުކަމެއް ޖެހުމުން މުސްލިމް އަޅާ އަމަލުކުރަންވީ ގޮތާއި ޝަރުއީ ހަމަތައް ދެނެގަތުމަކީ މުހިންމު ކަމެއް ކަމުގައި ހުތުބާގައި ފާހަގަ ކޮށްފައިވެއެވެ. މީގެ އިތުރުން ބައެއް މީހުން ހާސްވެ، ކަންބޮޑުވެ މާޔޫސްވެ މާތްﷲގެ ރަހްމަތުން އުއްމީދު ކަނޑައިލާ ކަމަށާއި ބައެއް މީހުންގެ އީމާންކަން ބަލިކަށިވެ ﷲއާމެދު ހީތައް ކުރާ ކަމަށް ހުތުބާގައި ބުނެފައިވެއެވެ.
ހުތުބާގައި އިތުރަށް ބުނެފައި ވަނީ ﷲ ތަޢާލާ ވަނީ ހުރިހާ ކަމެއް މިންވަރު ކުރައްވައިފައިކަން ކޮންމެ މުސްލިމަކު ހިތުގެ އަޑިން ގަބޫލުކޮށް ކަށަވަރު ކުރަން ޖެހޭ ކަމަށެވެ.
މީގެ އިތުރުން، ދުނިޔޭގައި އިންސާނާ ހިތްނޭދޭ ކަންކަން މާތްﷲ ލައްވަވައިފައި ވަނީ އިލާހީ މަތިވެރި ހިކުމަތަކަށް ޓަކައި ކަމަށާއި އެކަން ވަނީ އެކަލާނގެ އަދުލުވެރިކަމުގެ އިމްތިހާނުތަކުގެ ތެރެއިން ކަމަށް ހުތުުބާގައި ބުނެފައިވެއެވެ. އަދި މުސްލިމް އަޅާގެ މައްޗަށް ވަނީ މިފަދަ ކަންކަމުން އިބުރަތް ހާސިލުކުރުން ކަމަށާއި މިފަދަ ކަންކަން ބަލައިގަންނަން ވާނީ ޣާފިލުކަމުން ހޭލައްވައިލުމުގެ ގޮތުގައި ކަމަށެވެ.
"ތާޢޫނު ބައްޔާ ބެހޭ ގޮތުން ރަސޫލާއާ ސުވާލު ދެންނެވުނު ހިނދު ހަދީޘް ކުރެއްވިއެވެ. "އަދި ހަމަކަށަވަރުން ﷲ ތަޢާލާ އެ ބަލިމަޑުކަން ލައްވަވައިފައި ވަނީ މުއުމިނުންނަށް ރަހުމަތެއް ކަމުގައެވެ."
ހުތުބާގައި އިތުރަށް ބުނެފައި ވަނީ ދުނިޔޭގެ ހާލަތު އެއްގޮތެއްގައި ތާއަބަދު ދެމި ނޯންނާނޭ ކަމީ އަޅުގަނޑުމެން ގަބޫލުކުރަން ޖެހޭ ހަގީގަތް ކަމަށެވެ. ދަތިކަމަކަށް ފަހު ފަސޭހަ ކަމެއް އަންނާނެ ކަމަށާއި ތަދުކަމަކަށް ފަހު ތިޔާގިކަމެއް އަންނާނެ ކަމަށް ހުތުބާގައި ބުނެފައިވެއެވެ. ހަމަ އެފަދައިން ހިތާމަތަކާއި، ހިތްދަތިކަމާއި، ހިތްނޭދޭ ކަންކަން ތަހައްމަލު ކުރަން ނުޖެހޭ ބަޔަކު ނޫޅޭކަން ވެސް ހަނދާނަށް ގެންނަން ޖެހޭ ކަމަށް ހުތުބާގައި ބުނެފައިވެއެވެ.
"ކަންބޮޑުވެ މާޔޫސްނުވާށެވެ. ﷲގެ ރަހްމަތުން އުއްމީދު ކަނޑައިނުލާށެވެ. އެންމެހައި ބަލިތަކަށް ޝިފާ ދެއްވަނީ ﷲއެވެ."
Ads by STO
