ފިޔަވަޅުތައް ވަރުގަދަ ކުރުމުގެ ނަތީޖާ ފައްސި، ފައްސި އަދަދުތައް 300އަށް ވުރެ ދަށަށް!
ރާއްޖެއިން މިއަދު އިތުރު 295 މީހުން ކޮވިޑް-19އަށް ފައްސިވެފައިވާ ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ)ގެ ތަފާސް ހިސާބުތަކުން ދައްކައިފިއެވެ.
އެޗްޕީއޭގެ ހިސާބުތަކުން ދައްކައި ގޮތުގައި މިއަދު މާލެއިން ފައްސިވީ 138 މީހުންނެވެ. އަތޮޅުތެރެއިން މި ބައްޔަށް ފައްސިވީ 146 މީހުންނެވެ. އަދި ހިންގަމުން އަންނަ ރިސޯޓުތަކުން ފައްސިވީ 11 މީހުންނެވެ.
މިހާރު ރާއްޖެއިން ކޮވިޑް-19އަށް މުޅިއަކު ފައްސިވެފައި ވަނީ 69،831 މީހުންނެވެ.
ބަލިން ފަސޭހަވެފައިވަނީ 56،559 މީހުންނެވެ. އަދި މި ބަލީގައި ރާއްޖެއިން މިހާތަނަށް ނިޔާވެފައި ވަނީ 192 މީހުންނެވެ.
ރާއްޖެއިން ކޮވިޑް-19 އަށް ހޮސްޕިޓަލުތަކުގައި މިވަގުތު ފަރުވާ ދެމުންދަނީ 111 މީހުންނެވެ.
ފައްސިވާ އަދަދުތައް ހާހުން މައްޗަށް އަރައިފައި ވަނިކޮށް އެޗްޕީއޭއިން ވަނީ ރައްކާތެރިކަމުގެ ފިޔަވަޅުތައް ހަރުކަށިކޮށްފައެވެ. މި ފިޔަވަޅުތަކުގެ ނަތީޖާއެއްގެ ގޮތުން ފައްސި ނަމްބަރުތައް ވަނީ ބޮޑުތަނުން މިހައިރު ދަށްވާން ފަށައިފައެވެ.
