ހިސާން ދަންޖައްސަންޖެހޭ ކަމަށް ވިދާޅުވި މައްސަލައިގައި ޝިޔާމަށް މަޖިލީހުން ނަސޭހަތްދީފި
ތުޅާދޫ ދާއިރާގެ މެންބަރު ހިސާން ހުސައިން ދަންޖައްސަން ޖެހޭ ކަމަށް ވިދާޅުވެ ދެއްކެވި ވާހަކަފުޅުތަކާ ގުޅިގެން މީދޫ ދާއިރާގެ މެންބަރު އަޙްމަދު ޝިޔާމް މުޙައްމަދަށް މަޖިލީހުން ނަސޭހަތްތެރިވެއްޖެއެވެ.
މަޖިލީހުގެ މިއަދުގެ ޖަލްސާ ފައްޓަވަމުން ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުﷲ ވިދާޅުވީ މިކަމާ ގުޅިގެން މަޖިލީހުގެ ޤަވާއިދުގައިވާ ގޮތުގެ މަތިން މިކަން ބެލި އިމްތިޔާޒާއި ސުލޫކު ކޮމިޓީން ލަފާދެއްވާފައި ވަނީ މީދޫ ދާއިރާގެ މެންބަރު އަޙްމަދު ޝިޔާމަށް ލިޔުމުން ނަސޭހަތްތެރިވުމަށް ކަމަށެވެ.
އެހެންކަމުން މަޖިލީހުގެ ޤަދަރާއި ޝަރަފާއި، ކަރާމާތާއި އަބުރު ދެމެހެއްޓޭނެހެން މެންބަރުންގެ ޢަމަލުތައް ބެހެއްޓުމަށް މިފަދަ ކަމެއް ތަކުރާރު ނުކުރުމަށް މީދޫ ދާއިރާގެ މެންބަރު ޝިޔާމަށް ނަސޭހަތްތެރިވާ ކަމަށް ރިޔާސަތުން ވިދާޅުވިއެވެ. އަދި ނަސޭހަތުގެ ލިޔުން މެންބަރު ޝިޔާމަށް މިހާރު ވަނީ ފޮނުވާފައެވެ.
މެންބަރު ޝިޔާމްއަށް މަޖިލީހުން ނަސޭހަތްތެރިވެފައި ވަނީ މަޖިލީހުގެ ބައެއް މެންބަރުން ތިބި ތަނެއްގައި މެންބަރު ހިސާންއަކީ ދަންޖައްސަންޖެހޭ މީހެއް ކަމަށާއި، އެމެންބަރު މަރާލިޔަސް ފާފަވެރި ނުވާނެކަމަށް ބުނެ ވާހަކަދައްކަވައިފައި ވާތީއެވެ. މި މައްސަލަ ފުލުހުންގެ އިދާރާއަށާއި ޑިފެންސް މިނިސްޓްރީއަށް ވެސް ވަނީ ހުށަހަޅައިފައެވެ.
