ހޮސްޕިޓަލުގައި އެނދުމަތިވާ މީހުންގެ އަދަދު އިންތިހާ ދަށްވެއްޖެ!
ކޮވިޑް-19 ޖެހި، ބައްޔަށް ފަރުވާ ހޯދުމަށް ހޮސްޕިޓަލުގައި އެނދުމަތިވާ މީހުންގެ އަދަދު އިންތިހާއަށް ދަށްވެއްޖެއެވެ.
ނިމިދިޔަ މެއި މަހަކީ ރާއްޖޭގައި ކޮވިޑް-19ގެ ހާލަތު އިންތިހާ ދަރަޖައަށް ގޯސްވެގެން ދިޔަ މަހެކެވެ. އެގޮތުން އެމަހު ހޮސްޕިޓަލުގައި އެނދުމަތި ކޮށްގެން ފަރުވާ ދިން މީހުންގެ އަދަދު އުޅުނީ 200އިން މަތީގައެވެ.
އެންމެ ފަހުން އެޗްޕީއޭއިން އާންމުކުރި ތަފާސް ހިސާބުން ދައްކާ ގޮތުން، މިހާރު ވެސް ރާއްޖޭގައި ކޮވިޑް ޖެހިފައި ތިބި 4،262 މީހުން ތިބިއިރު، އޭގެ ތެރެއިން ހޮސްޕިޓަލުގައި އެނދުމަތި ކޮށްގެން ފަރުވާ ދޭ މީހުންގެ އަދަދަކީ، 38 އެވެ. މިއީ ކުރިއާ އަޅާ ބަލާއިރު ވަރަށް ބޮޑަށް ފައްސި ފަރަގެކެވެ.
މެއި މަހުގެ 25 ވަނަ ދުވަހު މާލޭގައި އިއުލާން ކުރި ކާފިއުގެ ސަބަބުން ބައްޔަށް ފައްސިވާ މީހުންގެ އަދަދު ދަށްވި ނަމަވެސް އޭގެ ކުރިން މާލެއިން ދުވާލެއްގެ މައްޗަށް ފައްސިވާ މީހުންގެ އަދަދު އުޅުނީ ހާހުން މަތީގައެވެ.
އެންމެ ފަހުން އެޗްޕީއޭއިން އާންމުކުރި ތަފާސް ހިސާބުތަކުން ދައްކާ ގޮތުގައި، ރާއްޖެއިން ކޮވިޑް ޖެހުނު މީހުންގެ ޖުމްލަ އަދަދު ވަނީ 72،678 އަށް އަރައިފައެވެ. އަދި ބަލިން ރަނގަޅުވި މީހުންގެ އަދަދު 68،196 އަށް އަރައިފައިވާއިރު، މިހާތަނަށް 208 މީހުން ކޮވިޑް ޖެހިގެން ރާއްޖެއިން ވަނީ މަރުވެފައެވެ.
