ކުޑަކުދިންގެ ހިޔާއަކީ ކުދީން ބައިތިއްބަން އެންމެ ރަނގަޅު ތަނެއް ނޫންކަން އެންގިން: ނިއުމަތު
ކުޑަކުދިން އެންމެ ރައްކާތެރިކަމާއި ސަލާމަތްތެރިކަން މަތީ ބެލެހެއްޓުމަށް، ކުޑަކުދިންގެ ހިޔާއަކީ އެންމެ ރަނގަޅު ތަން ނޫން ކަމަށް ބުނެ “ރިކޮމެންޑޭޝަން”ތަކެއް ފޮނުވައިފައިވާނެ ކަމަށް ޗިލްޑްރަންސް އޮންބަޑްސް ޕާސަން ނިއުމަތު ޝަފީޤު ވިދާޅުވެއްޖެއެވެ.
ސަންގު ޓީވީން ގެނެސްދޭ “ޚަބަރަށް ފަހު” ޕްރޮގުރާމުގައި ވާހަކަ ދައްކަވަމުން ނިއުމަތު ވިދާޅުވީ، މިއަހަރު އެކަނި ވެސް ހަފަހަރެއްގެ މަތިން އެކި ކަންކަމުގައި ކުޑަކުދިންގެ ހިޔާއަށް ޒިޔާރަތް ކޮށްފައި ވާނެ ކަމަށާއި، މިވަގުތު އެތަނުގެ ހާލަތު އޮތް ގޮތުން އެތަނަކީ ކުދިން ބަލަހައްޓަން އެންމެ ރަނގަޅު ތަނެއް ނޫން ކަމަށް ބުނެ ރިކޮމެންޑޭޝަން ތަކެއް ފޮނުވައިފައި ވާނެ ކަމަށެވެ.
ނިޢުމަތު ވިދާޅުވީ ހިޔާއަށް ޒިޔާރަތް ކުރުމުގެ ތެރޭގައި އެތަނަކީ ބަންދު ކުރެވޭ ތަނެއް ނޫންކަން ފާހަގަ ކުރެވިފައިވާ ކަމަށާއި، މުޅިން ބަންދު ނުކުރި ކަމުގައި ވީ ނަމަވެސް ކުދިންގެ ރައްކާތެރިކަމަށް ތަން ބަންދު ކުރެވޭ ގޮތް ހެދުން މުހިންމު ކަމަށެވެ. އެހެން ނަމަވެސް ތަން ބަންދު ކުރެވެން ނެތުމުން ކުދިންނަށް ދޭންވާ އެންމެ ފުރިހަމަ ރައްކާތެރިކަން ނުދެވޭ ކަމަށް ވެސް ނިޢުމަތު ވިދާޅުވިއެވެ.
މީގެ އިތުރުން އެތަނުން ފާހަގަ ކުރެވުނު ރިކޮމެންޑޭޝަންތައް ކަމާބެހޭ ފަރާތަށް މިހާރު ފޮނުވާފައިވާއިރު، ގާތްގަނޑަކަށް 17 ވަރަކަށް ރިކޮމެންޑޭޝަން ފޮނުވިފައިވާ ކަމަށް ވެސް ނިއުމަތު ފާހަގަ ކުރެއްވިއެވެ.
ވިލިމާލޭގައި ހުންނަ ހިޔާ ބަންދު ކުރެވުނު ނަމަވެސް އަތޮޅު ތެރޭގެ އެކި ހިސާބުތަކުގައި ހިޔާގެ އެކި ގޮފިތައް ގާއިމް ކުރެވި ދައުލަތުން ބެލުމަށް ކުދިންނާ ހަވާލުވަމުން އަންނަ ކަމަށް ފާހަގަ ކުރައްވައި ނިއުމަތު ވިދާޅުވީ، އެތަންތަނަކީ ކުދިންނަށް ފުރިހަމަ ރައްކާތެރިކަން ފޯރުކޮށްދެވޭ ފެންވަރު ރަނގަޅު ތަނަކަށް ހެދުމަކީ އެންމެ ބޮޑު އިސްކަމެއް ދީގެން ކުރައްވާނެ ކަމެއް ކަމަށެވެ.
އަޅުގަނޑު ދަންނަވާނީ ކުޑަކުދިންގެ ހިޔާއަކީ ކުދިން ބެލެހެއްޓުމަށް އެންމެ ރައްކާތެރި ތަނެއް ނޫން ގޮތަށް މިއޮތީ ނިމިފަ
ނިއުމަތު ވިދާޅުވީ، ވަގުތީ ގޮތުން އެތަން ހުޅުވައިފައި ހުރި ނަމަވެސް އެތަން މަރާމާތުކޮށް އެބޭފުޅުންގެ އޮޑިޓް ޓީމުން ތަން ބަލައި ފާސްކޮށް ޖެންޑަރ މިނިސްޓްރީން ހުއްދަ ލިބުމުން ނޫނީ ރަސްމީކޮށް ހިޔާ ނުހުޅުވާނެ ކަމަށެވެ.
