ވެކްސިނަށް 69 މިލިއަން ރުފިޔާ ޚަރަދުވާނެ: ފިނޭންސް މިނިސްޓަރ
ކޮވިޑް-19އިން ރައްކާތެރިވުމަށް ޖަހާ ވެކްސިން ގަތުމަށް ޓަކައި ދައުލަތުން 69 މިލިއަން ރުފިޔާ ޚަރަދު ވާނެކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
އަމީރު ވިދާޅުވީ ވެކްސިނުގެ ނުވަލައްކަ ޑޯޒަށް ދައުލަތުން 69 މިލިއަން ރުފިޔާ ހަރަދުވާނެކަމަށާއި ހިލޭ އެހީގެ ގޮތުގައި ވެސް ވެކްސިން ލިބިފައިވާ ކަމަށެވެ.
އޮންލައިން މީޑިޔާ “މިހާރު"އަށް ދެއްވި އިންޓަވިއުއެއްގައި އަމީރު ވިދާޅުވީ، ކޮވިޑް ވެކްސިންގެ ނުވަ ލައްކަ ޑޯޒް ހޯދަން ބޭރުގެ އެކި ފަރާތްތަކާ އެކު ސޮއިކޮށްފައިވާކަމަށެވެ.
އަމީރު ވިދާޅުވީ ވެކްސިނުގެ ކޮންޓްރެކްޓް ވެލިއުއަކީ ގާތްގަނޑަކަށް 4.6 މިލިއަން ޑޮލަރު ކަމަަށާއި އޭގެ ތެރެއިން މިހާތަނަށް 2.6 މިލިއަން ޑޮލަރު ވެކްސިނަށް ހޭދަކޮށްފައިވާކަމަށެވެ.
"އަޅުގަނޑުމެންގެ ކޮންޓްރެކްޓް ވެލިއުއަކީ ގާތްގަނޑަކަށް 4.5 މިލިއަން ޑޮލަރު، އޭގެ ތެރެއިން މިހާތަނަށް 2.6 މިލިއަން ޑޮލަރުގެ ވެކްސިން މިވަނީ ގަނެފައި" މިނިސްޓަރު ވިދާޅުވި އެވެ.
ކޮވިޑް19 އިން ދިފާއުވުމަަށް ރާއްޖޭގައި މިހާރު 3 ބާވަތެއްގެ ވެކްސިނެއް ދަނީ ޖަހަމުންނެވެ. އެއީ ކޮވިޝީލްޑް ވެކްސިިނާއި ސިނޮފާމް ވެކްސިނުގެ އިތުރުން ފައިޒާ ވެކްސިނެވެ.
ކޮވިޑް19އިން ރައްކާތެރިވުމަށް ރާއްޖޭގައި ޖަހާ ކޮވިޝީލްޑް ވެކްސިން ހުސްވެ ރާއްޖެ ކޮވިޝީލްޑް ވެކްސިނަށް ޖެހިފައިވަނިކޮށް މިދިޔަ ހަފްތާގައި ވެކްސިން ލިބިފައިވުމާ އެކު އަލުން އެ ވެކްސިން ޖަހަން ވަނީ ފަށައިފައެވެ.
Ads by STO
