ހުޅުމާލޭގައި މެދުފަންތީގެ 114 ހައުސިން ޔުނިޓް އަޅަން ހަވާލުކޮށްފި
ހުޅުމާލޭގައި މެދުފަންތީގެ ގެދޮރުވެރިންނަށް ހާއްސަކޮށްގެން 114 ހައުސިން ޔުނިޓު އެޅުމަށް ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ)އިން މިއަދު ކުންފުންޏަކާ ހަވާލުކޮށްފިއެވެ.
އެޗްޑީސީން މިއަދު ވަނީ މި ހަައުސިން ޔުނިޓުތަކުގެ މަސައްކަތުގެ އެއްބަސްވުމުގައި ސޮއިކޮށްފައެވެ. އަދި މިއެއްބަސްވުމުގެ ދަށުން މި ހައުސިން ޔުނިޓުތައް އެޅުމަށް ހަވާލު ކޮށްފައިވަނީ ސާސޭ ގްލަޓް ޖޭވީ ޕްރައިވެޓް ލިމިޓެޑާއެވެ.
މެދުފަންތީގެ ގެދޮރުވެރިންނަށް ހާއްސަކޮށްގެން ހިންގާ މިކްސްޑް ޔޫސް ރެސިޑެންޝަލް ޔުނިޓް އިމާރާތް ކުރުމަށް ސާސޭ ގްލަޓް ޖޭވީ ޕްރައިވެޓް ލިމިޓެޑާ ހަވާލުކުރުމަށް ބޭއްވި ރަސްމިއްޔާތުގައި ސާސޭ ގްލަޓް ޖޭވީ ޕްރައިވެޓް ލިމިޓެޑްގެ ފަރާތުން މި އެއްބަސްވުމުގައި ސޮއިކޮށްފައި ވަނީ އެކުންފުނީގެ މެނޭޖިން ޑިރެކްޓަރު އަބްދުﷲ ސަވާދެވެ. އަދި އެޗްޑީސީގެ ފަރާތުން ސޮއި ކުރެއްވީ، އެ ކުންފުނީގެ މެނޭޖިން ޑިރެކްޓަރު ސުހައިލް އަހުމަދެވެ.
މި މަޝްރޫއުގެ ދަށުން އަޅާ 114 ޔުނިޓްގެ ތެރެއިން 60 ޕަސެންޓް ޔުނިޓް ވިއްކޭ އެންމެ ބޮޑު އަގަކީ، އަކަ ފޫޓަކަށް 2185 ރުފިޔާ އެވެ. އަދި ބާކީ 40 ޕަސެންޓް ޔުނިޓްތައް، މާކެޓު އަގުތަކުގައި ވިއްކުމަށް ޑިވަލޮޕަރުންނަށް ފުރުސަތު ދީފައިވާއިރު ވީހާވެސް އަގު ކުޑަކޮށް އާއްމުންނަށް ހުޅުވައިލުމަށް ޕްރައިވެޓައިޒް ކޮށްފައިވާ މި ޕްރޮޖެކްޓް އިމާރާތް ކުރުމަށް ހަމަޖެހިފައި ވަނީ ހުޅުމާލޭ S1-3 ގެ 11445 ގައި ކަމަށް އެޗްޑީސީއިން މައުލޫމާތު ދެއެވެ.
