ރައީސް ނަޝީދަށް ހަމަލާދިނީ ކޯލިޝަނުން ކަމަށް ޝައްކު ކުރެވޭ، ރައީސް ޞާލިޙް އިސްތިއުފާ ދެއްވާ: ބޮންޑޭ
މެއި ހަ ވަނަ ދުވަހު ރައީސް މުޙައްމަދު ނަޝީދަށް އަމާޒުކޮށް ދިން ނިރުބަވެރި ހަމަލާގެ ފަހަތުގައި ސަރުކާރު ހިންގާ ކޯލިޝަންގެ އަތެއްވާ ކަމަށް ތުހުމަތު ކުރެވޭ ކަމަށް މާފަންނު އުތުރު ދާއިރާގެ މެމްބަރު އިބްރާހީމް ރަޝީދު (ބޮންޑެ) ވިދާޅުވެއްޖެއެވެ.
ނަފުރަތު އުފެއްދުމަކީ ކުށަކަށް ހަދައި ގާނޫނުލްއުގޫބާތަށް އިސްލާހު ގެނައުމުގެ ބިލްގެ ބަހުސްގައި ވާހަކަ ދައްކަވަމުން ބޮންޑެ ވިދާޅުވީ، ސަރުކާރުން ނަފުރަތުގެ ބިލް މަޖިލީހަށް ވެއްދީ ރައީސް ނަޝީދަށް ހަމަލާ ދިނުމުން ހަމަލާގެ ތަހްޤީޤްގެ ފޯކަސް ގެއްލުވާލާން ކަމަށެވެ.
"ބިލް ފޮނުވައިފައި މި އޮންނަނީ 6 މެއި ގައި. މަޖިލީހުގެ ރައީސް އަވަހާރަކޮށްލަން ބޮން ގޮއްވައިލައިފަ، އެމައްސަލައިގައި ރައްޔިތުން ކަންބޮޑުވެ އެ ވާހަކަތައް ދައްކަން ފެށީމަ، އެވާހަކަ ތަކުގެ މިސްރާބު ފޯކަސް އަނބުރާލުމަށް ޓަކައި ސަރުކާރުގެ ކޯލިޝަނުން މި ބިލް ފޮނުވީ" ބޮންޑެ ވިދާޅުވިއެވެ.
ބޮންޑޭ ވިދާޅުވީ ސަރުކާރުން މި ބިލް ފޮނުވުމަށް ފަހު ސަރުކާރުގެ ވުޒާރާތަކުގައި ތިބި ފަރާތްތަކުން މި ބިލާ އިދިކޮޅަށް ވާހަކަ ދައްކާ، މުޅި މީޑިއާ ބޭނުންކޮށްގެން އެ ހުރިހާ ބަދުނާމެއް އެޅުވީ ހިސާންގެ ބޮލުގައި ކަމަށެވެ. އަދި މިކަމުގެ ބޭނުމަކީ ރައީސް ނަޝީދުގެ ތަހްޤީޤްގެ މައްސަލަ އެހެން ދިމާލަކަށް މިސްރާބު އަނބުރައިލައި ބޮން ގޮއްވި މީހުން ސަލާމަތްކޮށްދިނުން ކަމަށް ބޮންޑެ ތުހުމަތު ކުރެއްވިއެވެ.
"އަޅުގަނޑު ތުހުމަތު ކުރަން ސަރުކާރު މިކަމުގައި ހިމެނޭކަން. އަޅުގަނޑަށް ޝައްކު ކުރެވޭ މިހާރު ސަރުކާރުގެ ކޯލިޝަންގައި ތިބި ބަޔަކު ރައީސް ނަޝީދު އަވަހާރަކޮށްލަން ބޮން ގޮއްވާލާފައި އެވާހަކަތަކާއި ތަހްޤީޤްތަކުގެ މިސްރާބް އެހެން ދިމާޔަކަށް އަނބުރައިލުމަށް ޓަކައި އެކަން ތަޙްޤީޤްކޮށް ބަލަން ހުރި މުއައްސަސާއަށް ރައްޔިތުންގެ މަޖިލީހުން ކަނޑައަޅައިފައިވާ މެންބަރު ހިސާން ހުސެން އަވަހާރަކޮށްލަން ދެވަނަ ރޭވުމެއް މިއޮތީ ރާވައިފަ." ބޮންޑެ ވިދާޅުވީ ހިސާން މެދުވެރިކޮށް ބިލު ސްޕޮންސާ ކުރެއްވީ ވެސް ރޭވެވުމެއްގެ ދަށުން ކަމަށެވެ.
ބޮންޑެގެ ވާހަަކަފުޅުގައި ރައީސް ޞާލިޙަށް ވަނީ ވަރަށް ބޮޑަށް ފާޑު ވިދާޅުވެފައެވެ. އަދި މި ބިލް ހުށަހެޅީ ސަރުކާރުން ކަމަށާއި ބިލާ ދެކޮޅަށް ވާހަކަ ދައްކަނީ ވެސް ސަރުކާރުން ކަމަށް ވިދާޅުވެ، މިވަރުގެ ކަމެއް ހިނގާއިރު ފަހަތަށް ޖެހުމުން ރައީސް އިސްތިއުފާ ދެއްވަން ޖެހޭނެ ކަަމަށް ވެސް އޭނާ ވިދާޅުވިއެވެ.
"އަޅުގަނޑު އެދެން ރައީސުލް ޖުމްހޫރިއްޔާ އިސްތިއުފާ ދޭން. އަޅުގަނޑު އެދެން ކެބިނެޓް އުވާލަން." ބޮންޑޭ ވިދާޅުވިއެވެ.
ތިޔަބުނާބިލެއް ފަރުމާކޮށް ހުށައެޅީ އަންނީގެ ވަގުބިޓުކަމަށް ގިނަފަރާތްތަކުން ބުނެއެވެ
ޔެސް އަންނިއާ ދިމާލަށް ލާދީނީ ގޮވާތީ އަންނި ދެރަވަނީޔޯ އެހެންވެ