ސައިކަލްތައް ނަގައިދިނުމަށް މާރިޔާ އެދުނު ވާހަކައަކީ ދޮގެއް: ޝިފާ

ރައީސް ނަޝީދަށް ސެކިއުރިޓީ ދޭން އުނދަގޫވާތީ، އެމަނިކުފާނު ދިރިއުޅުއްވާ ގެކޮޅު ހުންނަ މަގުގައި ހުންނަ ސައިކަލުތައް ނަގައި ދިނުމަށް އެދި ޑިފެންސް މިނިސްޓަރ އަލްއުސްތާޛާ މާރިޔާ އަހްމަދު ދީދީ، މާލެ ސިޓީގެ ކުރީގެ މޭޔަރ ޝިފާ މުޙައްމަދު އަރިހުގައި ފޯނުން ގުޅުއްވައި ދެންނެވި ކަމަށް މަޖިލީހުގެ އިންކުއަރީގައި މިނިސްޓަރ ވިދާޅުވި ނަމަވެސް އެއީ ދޮގެއްކަމަށް ޝިފާ ވިދާޅުވެއްޖެއެވެ.

Ads by Sosun Fihaara

މެއި ހައެއްގައި ރައީސް ނަޝީދަށް ދިން ހަމަލައާ ގުޅިގެން ހިންގި މަޖިލިސް އިންކުއަރީ ރިޕޯޓްގައި ވިދާޅުވެފައި ވާގޮތުގައި އެސައިކަލުތައް ނަގައި ދިނުމަށް އެދި މިނިސްޓަރ އަލްއުސްތާޛާ މާރިޔާ އަހްމަދު ދީދީ، ކުރީގެ މޭޔަރ ޝިފާ މުޙައްމަދު އަރިހުގައި ފޯނުން ގުޅުއްވައި
ދެންނެވި ނަމަވެސް ޝިފާ ވިދާޅުވީ އެސަައިކަލުތަކުގެ މައްސަލައިގައި މިނިސްޓަރ އަލްއުސްތާޛާ މާރިޔާ އަޙްމަދުދީދީ ގުޅުއްވައިފައި ނުވާ ކަމަށާއި އަދި މިނިސްޓަރާ ފޯނުން ވާހަކަ ވެސް ނުދައްކަވާ ކަމަށެވެ.

"އެސައިކަލުތައް ނަގައި ދިނުމަށް އެދި މިނިސްޓަރ އަލްއުސްތާޛާ މާރިޔާ އަހްމަދު ދީދީ، ކުރީގެ މޭޔަރ ޝިފާ މުޙައްމަދު އަރިހުގައި ފޯނުން ގުޅުއްވައި ދެންނެވި ކަމަށް މި އިންކުއަރީގައި މިނިސްޓަރ އަލްއުސްތާޛާ މާރިޔާ
އަޙްމަދު ދީދީ ވިދާޅުވެފައިވާއިރު، ކުރީގެ މޭޔަރ ޝިފާ މުޙައްމަދު ވިދާޅުވެފައި ވަނީ މިނިސްޓަރ އަލްއުސްތާޛާ މާރިޔާ އަޙްމަދުދީދީ ގުޅުއްވައިފައި ނުވާ ކަމަށާއި އަދި މިނިސްޓަރާ ފޯނުން ވާހަކަފުޅު ނުދައްކަވާ ކަމަށެވެ." އިންކުއަރީ ރިޕޯޓްގައިވެއެވެ.

ރައީސް މުޙައްމަދު ނަޝީދު ދިރިއުޅުއްވާ ކެނެރީގެ ހުންނަ ނީލޯފަރު ހިނގުމަކީ އެމަގުގެ އެއްފަޅީގައި ގިނަ އަދަދަކަށް ސައިކަލު ޕާކް ކޮށްފައި ހުންނަ މަގެއްކަން 241 ކޮމިޓީގެ އިންކުއަރީގައި ވެސް ވަނީ ފާހަގަކޮށްފައެވެ. އަދި އެ ގޮތަށް ސައިކަލު ޕާކު ކޮށްފައި ހުރުމަކީ ކަންބޮޑުވާ ކަމެއް ކަމާއި، އެކަމަކީ ހަމަލާއެއް ދިނުމުގެ ފުރުޞަތު އޮތް ކަމެއްކަން އެމް.އެން.ޑީ.އެފްއިން އަބަދުވެސް ދެކެމުންދިޔަކަން އެ އިންކުއަރީއަށް ގަބޫލު ކުރެވޭކަމަށް އެރިޕޯޓްގައި ވަނީ ފާހަގަކޮށްފައެެވެ.

"އަޅުގަނޑުމެން ޕްރެސް ބްރީފިންގައި އެހެން ބުނިން، ސައިކަލްތަކުގެ ވާހަކައާއި އަދި ވަކިން ޚާއްޞަކޮށް އަޅުގަނޑު ބުނިން، ސައިކަލެއްގައޭ މިއޮތީ ގޮއްވައިލައިފައި. ދެން، ސައިކަލްގެ ކޮންސަރން. ދެން ފުރަތަމަ އެހިސާބަށް ދަންޏާ ސައިކަލެއްގައި މިކަމެއް ކުރުމަކީ ހަމަ ރޭންޖުއޮފް ޕޮސިބިލިޓީޒްގެ ތެރެއިން ބައިވަރު ޕޮސިބިލިޓީޒްގެ ތެރެއިން ޕޮސިބިލިޓީއެއް ކަމަށް އަޅުގަނޑުމެން ހަމަ އަބަދުވެސް ބަލަމުންދިޔައީ." އިންކުއަރީއަށް މައުލޫމާތު ދެއްވަމުން ޗީފް އޮފް ޑިފެންސް މޭޖަރ ޖެނެރަލް އަބްދުﷲ ޝަމާލް ވިދާޅުވެފައިވާކަމަށް އިންކުއަރީ ރިޕޯޓްގައި ބުނެފައިވެއެވެ.

އިންކުއަރީ ރިޕޯޓު މިއަދު އާންމުކޮށްފައިވީ ނަމަވެސް، މިއީ ސިއްރު ރިޕޯޓެކެވެ. އަދި މިއަދު އާންމުކޮށްފައި މިވާ ރިޕޯޓުގައިވާ ޤައުމީ ސަލާމަތާއި ގުޅުންހުރި ބައިތައް ވަނީ އުނި ކޮށްފައެވެ. އަދި މި ރިޕޯޓުގެ އަސްލު ރިޕޯޓު (ސިއްރު ކޮށްފައި ނުވާ ރިޕޯޓު) ހިއްސާ ކުރުމަށް ނިންމައިފައި ވަނީ ރައީސުލްޖުމްހޫރިއްޔާއަށާއި ރައްޔިތުންގެ މަޖިލީހުގެ ރައީސްއަށާއި އުއްތަމަ ފަނޑިޔާރަށް ކަން ވެސް މިއަދު އާންމުކުރި ރިޕޯޓުގައި ބަޔާންކޮށްފައިވެއެވެ.