ކޮވިޑް ގައިޑްލައިނާ ޚިލާފުވެގެން މާލެ ސަރަހައްދުގެ 3 ގެސްޓު ހައުސްއެއްގެ ހުއްދަ ބާތިލް ކޮށްފި
ކޮވިޑް-19އާ ގުޅިގެން އަޅައިފައިވާ ފިޔަވަޅުތަކަށް ޢަމަލު ނުކުރުމާ ގުޅިގެން، މާލެ ސަރަހައްދުގެ 3 ގެސްޓު ހައުސްއެއްގެ ހުއްދަ ބާޠިލްކޮށްފައިވާ ކަމަށް، ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން ވިދާޅުވީ، 3 ގެސްޓު ހައުސްއެއްގެ ހުއްދަ ބާޠިލްކޮށް އިތުރު 3 ތަނަކަށް އިންޒާރު ދީފައިވާ ކަމަށެވެ. އަދި ހުއްދަ ބާތިލްކޮށްފައި ވަނީ އެޗްޕީއޭއިން ، ދެކުނު އޭޝިއާގެ ފަތުރުވެރިންނާއި ގުޅޭ ގޮތުން ނެރެފައިވާ އެންގުމާއި ޚިލާފުވުމުން ކަމަށެވެ.
މިކަމާ ގުޅިގެން ޓޫރިޒަމް މިނިސްޓަރ މައުސޫމް ވިދާޅުވީ މިހާރު ކަނޑައެޅިފައިވާ ގައިޑްލައިންތަކަކީ އެންމެންގެ ރައްކަލަކަށް ހެދިފައިވާ ގައިޑްލައިންތަކެއް ކަމުން އެއަށް ޢަމަލު ކުރުން މުހިންމު ކަމަށެވެ.
އެޗްޕީއޭއިން ނެރެފައިވާ ގައިޑްލައިންގައިވާ ގޮތުން، ރާއްޖޭގެ އެއްވެސް ރަށެއްގެ ގެސްޓްހައުސްއެއްގައި މިވަގުތަށް ދެކުނު އޭޝިއާ ފަތުރުވެރިން ބޭތިއްބުމަކީ މަނާކަމެކެވެ. އަދި ޓްރާންސިޓް ހާލަތުގައި ފިޔަވައި މާލެ ސަރަހައްދުގެ ގެސްޓު ހައުސްތަކުގައި 48 ގަޑި އިރަށް ވުރެ ގިނަ އިރަށް ދެކުނު އޭޝިއާގެ ފަތުރުވެރިންނަކަށް ނުތިބެވޭނެއެވެ.
