އެޑްމިޝަން ފީއެއްގެ ގޮތުގައި ދައްކަން ޖެހެނީ ގަސް!
އިންޑިއާ: ބިހާރުގެ ޓިއުޝަން ކްލާހަކުން އެޑްމިޝަން ފީއެއްގެ ގޮތުގައި ކުދީންގެ އަތުން ގަސް ނަގަމުންދާތީ އެ ކަމަށް ޚާއްޞަ ޞަމާލުކަމެއް ލިބިއްޖެއެވެ.
އިންޑިއާގެ މީޑިއާތަކުން ރިޕޯޓް ކޮށްފައިވާ ގޮތުގައި ބިހާރުގެ ވެރިރަށް ޕަޓްނާގެ ތިމާވެށީގެ މައްސަލަތަކަށް ވަކާލާތު ކުރާ އެކްޓިވިސްޓެއް ކަމަށްވާ ރާޖޭސްކުމާރު ސުނަންއާއި އޭނާގެ ބައިވެރީން ، މި ޓިއުޝަން ކްލާސް ހިންގަމުންދަނީ އެއްވެސް ފީއެއް ނުނަގައި ހިލެއެވެ. އެޑްމިޝަންގެ ފީއެއްގެ ގޮތުގައި ކުއްޖަކު ދައްކަން ޖެހެނީ 18 ގަހެވެ.
މީޑިއާތަކުން ރިޕޯޓްކޮށްފައިވާ ގޮތުގައި އެ ކްލާސް ޚާއްޞަކޮށްފައި ވަނީ ފަޤީރު ޢާއިލާތަކުގެ ކުދީންނަށެވެ. އެފަދަ ކުދީން އިމްތިހާންތަކަށް ތައްޔާރުކޮށްދިނުމަށް ހިންގާ އެ ކްލާހުގެ ކިޔަވައިދެނީ އެހެން ތަންތަނުގައި މަސައްކަތް ކުރާ މީހުން ކަމަށްވާތީ ކްލާހުގައި ކިޔަވައި ދެނީ ހެނދުނުު ދެ ގަޑިއިރާއި ހަވީރު ދެ ގަޑިއިރުގައެވެ.
މި ކްލާހުން މިހާތަނަށް 5000އަށް ވުރެ ގިނަ ކުދީން ތަޢުލީމް ޙާޞިލްކޮށްފައިވެއެވެ. އޭގެ ތެރެއިން 500އަށް ވުރެ ގިނަ ކުދީންނަށް ވަނީ ސަރުކާރުގެ ވަޒީފާ ލިބިފައެވެ.
