ޤަރާރުގެ ސަބަބުން ރައީސް ޞާލިޙަށް ގޮތް ނިންމަވަން ފުރުސަތު ފަހިވެގެންދާނެ: ރައީސް ނަޝީދު
ޓެރަރިޒަމާ ދެކޮޅަށް ރާއްޖޭގައި ކުއްލި ނުރައްކަލުގެ ހާލަތު އިއުލާން ކުރަން ގޮވައިލާ އެމްޑީޕީގެ ޤައުމީ މަޖިލީހަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ޤަރާރެއް ހުށަހެޅުއްވީ, އެ ޤަރާރުގެ ސަބަބުން ރައީސް ޞާލިޙަށް އެކަމުގައިި ގޮތް ނިންމެވުމަށް އިތުރު ޖާގައެއް ލިބިވަޑައިގަންނަވާނެ ކަމަށް ގަބޫލުފުޅު ކުރައްވާތީ ކަމަށް ރައީސް މުހައްމަދު ނަޝީދު ވިދާޅުވެއްޖެއެވެ.
ރައީސް ނަޝީދަށް އަމާޒުކޮށް މެއި ހަވަނަ ދުވަހު ދިން ހަމަލާގެ ތަޙްޤީޤަށް ހާމަވި މައުލޫމާތުތަކުން ފުލުހުން އާއްމު ކުރި މައުލޫމާތު ތަކަށް ބަލާއިރު، ޓެރެރިޒަމްއާ ދެކޮޅަށް ކުއްލި ނުރައްކަލުގެ ހާލަތު އިއުލާން ކުރުމަށް ރައީސަށް ދެންނެވުމަށް އެމްޑީޕީއިން ރޭ ބޭއްވި ޤައުމީ ޖަލްސާއިންވަނީ ނިންމައިފައެވެ.
މިޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، އެ ޤަރާރު ހުށަހެޅުއްވީ އެއްވެސް ހާލެއްގައި ރައީސުލްޖުމްހޫރިއްޔާއަށް ގާނޫނީ ގޮތުން ލިބިދީފައިވާ އެއްވެސް ބާރަކަށް ޕާޓީގެ ފަރާތުން ކުޑަވެސް ކިލަނބެއް ގެނައުމުގެ ނިޔަތަކު ނޫން ކަމަށެވެ. އަދި އެ ޤަރާރުވެގެންދާނީ ރައީސް ޞާލިޙް ނިންމަވާ ނިންމެވުމެއް، ނިންމެވުމަށްޓަކައި ލިބިދޭ އިތުރު ފުރުސަތަކަށް، އިތުރު ޖާގައަކަށް ކަމަށްވެސް ރައީސް ނަޝީދު ވިދާޅުވިއެވެ.
"އަޅުގަނޑަށް ޔަގީން ކަށަވަރު، ރައީސުލްޖުމްހޫރިއްޔާ އަޅުގަނޑުމެންގެ ގަރާރާ މެދު ވިސްނަވާނެ." ރައީސް ނަޝީދު ވިދާޅުވިއެވެ.
އޮންލައިންކޮށް ބޭއްވި މި ބައްދަލުވުމުގައި ބައިވެރިވެވަޑައިގަތީ އެމްޑީޕީގެ ގައުމީ މަޖިލީހުގެ 148 މެމްބަރުންގެ ތެރެއިން އެންމެ 41 ބޭފުޅެކެވެ. ގަރާރު ފާސްކުރީ ވަރަށް ހަނި އަޣުލަބިއްޔަތެއް ކަމަށްވާ 39 ބޭފުޅެއްގެ ވޯޓުންނެވެ. މި ބައްދަލުވުމުގައި ރައީސް ޞާލިޙަށް ތާޢީދު ކުރައްވާ ބޭފުޅުން ބައިވެރިވެ ވަޑައިގެންފައެއް ނުވެއެވެ.
ނަޝީދު ގެ އޮތީ އެންމެ މަގުސަދެއް، އެއީ ވެރިކަން..
ނަޝީދު ފެކްސަނައް ތިންބައި ކޮށް ފަ އެއްބައިވެސް ހަމަނުވޭ ދެން ކިހިނެއް ތިވަރުގެ މަދު މީސްކޮޅެއް ގެ ގަރާރެއް މަޖްލިސް ޗުއްޓީގަ އޮއްވާ މަޖްލިސް ކޮއްގެން ފާސް ކުރާނީ.ގައުމުގެ ރައީސް އާ ސިޔާސީ ގުޅުން ކެނޑި ކަމައް ހުރިހާ ހަބަރު ފަތުރާ ވަސީލަތް ތަކަކައް ދީފަ މިހާރު ހުށަހަޅާ ގަރާރުން ރައީސް ސޯލިހައް މޮޅު ތަކެއް ވާނެއޭ ބުނީމަ ދިވެހިންގެ ގިނަ ބަޔަކު ގަބޫލެއް ނުކުރާނެ.ނަޝީދު ވެސްތީ ދާއިރާއެއް ތަމްސީލު ކުރައް ހޮވިފަ ހުރި މީހެއްކަން ހަދުމަ ނެތުނީތޯ..